အိပ်စက်ခြင်းရဲ့အလှ
တစ်နေကုန်အမြဲတမ်းငိုင်ငိုင်ကြီးဖြစ်နေတယ်။ အကြာကြီးအိပ်ထားလဲ ငိုက်မြဲငိုက်နေတုန်းပဲ။ ပင်ပန်းတယ်။ အလုပ်လဲမပြီးဘူး။ ဒီသံသရာကလည်နေတယ် ဘာလုပ်ရမလဲ။
ကျောင်းတက်နေတုန်းတောက်လျှောက် ကျနော်ဖြေရှင်းခဲ့ရတဲ့ နေ့စဥ်ဖြေရှင်းနေရဆဲပြဿနာတစ်ခုပါ။ ကျနော်ကော်ဖီမသောက်တတ်ဘူး(လာမည်)။ Energy drinkတွေ အချိုရည်တွေ ဘာတစ်ခုမှမသောက်တတ်ဘူး။ အိပ်ချိန်လဲခနလေးမအိပ်တတ်ဘူး အကြာကြီးအိပ်တတ်တယ်။
စာလုပ်ရင်း စာရေးရင်းအလုပ်လုပ်ရင်းနဲ့ညဆို နောက်ကျမှအိပ်တတ်တယ်။ တစ်ယောက်တည်းနေတာဆိုတော့ ည၈နာရီအိပ်အိပ် မနက် ၆နာရီမှအိပ်အိပ် ဘာမှသိပ်မကွာဘူး။
ကြာလာတော့ ခန္တာကိုယ်ကြီးတစ်ခုလုံးက လိုအပ်သလောက် ခွန်အားမထုတ်လုပ်နိုင်ဘူးဖြစ်လာတယ် ကျနော်အလုပ်မလုပ်နိုင်တော့ဘူး။ နေ့စဥ်နေ့တိုင်းက ခွန်အားအပြည့်နဲ့နိုးထလာခြင်းမဟုတ်တော့ဘဲ စစ်ထွက်တိုက်တော့မယ့်စစ်သားတစ်ဦးလို အားအင်ချိနဲ့နေတယ်။ ဘာဆက်လုပ်ရမလဲ။
ဒီနေရာမှာ ကျနော်ပြောချင်တဲ့ကိစ္စတွေများတယ်။ ဒီလိုဖြစ်စေတဲ့အကြောင်းအရင်းတွေကလဲ အများကြီးပဲ (အာဟာရချို့တဲ့ခြင်း၊ အိပ်ချိန်မလုံလောက်ခြင်း၊ ခန္တာကိုယ်ရဲ့ရှိရင်းစွဲရောဂါအခြေအနေတစ်ခုခု၊ အသက်ရှူမဝခြင်း၊ အကျင့်တစ်ခုခု၊...)။ ဒီထဲကမှ ဖြစ်တတ်တဲ့ကိစ္စလေးတွေကိုပဲ ဦးတည်ချင်တယ်။
ညနောက်ကျမှအိပ်တာ
တချို့တွေ ၆နာရီလောက်အိပ်လိုက်ရုံနဲ့ သန်မာနေဆဲပဲ။ အကုန်အဆင်ပြေတယ်။ တချို့ကျတော့ ၁၀နာရီအိပ်အိပ် အိပ်ရေးမဝဘူး။
ခန္တာကိုယ်တွေ ဘယ်လောက်ကြီးပဲကွာဟနေပါစေ သေချာတာတစ်ခုကတော့ ညနောက်ကျမှအိပ်တာလုံးဝမကောင်းဘူးဆိုတာ အားလုံးသိကြပါလိမ့်မယ်။ စောအိပ်ဖို့လဲ ခက်ခဲကြမှာပါ။
ညနောက်ကျတယ်ဆိုတာက ဘာအကြောင်းအရင်းနဲ့ပဲဖြစ်ပါစေ မကောင်းဘူး။ အလုပ်လုပ်နေရင်းနောက်ကျသွားတယ်။ ၁၀နာရီ ၁၁ နာရီ ၁၂နာရီ တဖြည်းဖြည်းနဲ့ညဥ့်နက်လာလေလေ ခန္တာကိုယ်က ပိုပြီးပင်ပန်းလာလေလေပဲ။
လုပ်နေတဲ့အလုပ်တွေလဲ ပုံမှန်လိုမလုပ်နိုင်တော့ဘူး။ တစ်ခဏအတွင်းလုပ်နိုင်တဲ့ ဘယ်ကိစ္စမဆို နာရီနဲ့ချီကြာမြင့်လာတယ်။ မနက်ဖြန်ထရဦးမယ်။ အလုပ်သွားရဦးမယ်။ ဘာလုပ်ရဦးမယ် စတဲ့ပူပန်စိတ်တွေကကြီးစိုးလာတယ်။ မဖြစ်ပါစေနဲ့။
ခန္တာကိုယ်ဆိုတာက စက်ပစ္စည်းတစ်ခုလို ချက်ခြင်း အဖွင့်အပိတ် On, Offလုပ်လို့မရပါဘူး။ အချိန်လိုပါတယ်။ တဖြည်းဖြည်းချင်းနဲ့အိပ်ဖို့ကို ဦးတည်ရမှာပါ။ ဒီအတွက် စောအိပ်ရပါမယ်။
စောအိပ်ဖို့ကြိုးစားချင်ရင်တော့
- ညဘယ်အချိန်အိပ်အိပ် မနက်ဖန်မနက် ၅ နာရီ ရအောင်ထကြည့်ပါ။ အိပ်ချင်နေသေးလဲ ရအောင်နိုးထပါ။
- အားကစားတစ်ခုခုလုပ်ပါ။
- နေ့လည်တစ်ရေးအိပ်တာမျိုးကို ရအောင်ရှောင်ပါ။ အရမ်းအိပ်ချင်လာရင်တော့ တရားထိုင်တာမျိုးဖြစ်ဖြစ် ၁၀ မိနစ်Power napဖြစ်ဖြစ်လုပ်ပါ။
- ထိုနေ့ညစောအိပ်ပါ။
အိပ်စက်ခြင်းမာယာ
ကျနော်တို့က အိပ်တယ်ဆိုရင် အိပ်နေတဲ့အချိန်အကုန်လုံးကို အိပ်နေတယ်လို့ထင်တယ်။ အမှန်တကယ်က အိပ်နေတဲ့အချိန်အတွင်းမှာတင် နှစ်ခြိုက်စွာအိပ်ပျော်တဲ့ကာလ၊ နိုးကြားစွာအိပ်စက်တဲ့ကာလ၊ အိပ်မက်မက်တဲ့ကာလရှိတယ်။ ကြားထဲ အမှတ်တမဲ့နိုးထတဲ့ကာလလဲရှိတယ်။
ဆိုပါစို့ အိပ်တာက ည ၁၂နာရီကနေ မနက် ၈နာရီအထိ ၈ နာရီတောင်အိပ်ထားတာပဲ ငါဘာလို့အိပ်ရေးမဝတာလဲ? အိပ်တဲ့ကွာလတီ (Sleeping Quality) မကောင်းလို့ပါ။
ဘာလို့မကောင်းတာလဲ အကြောင်းအမျိုးမျိုးကြောင့်ဖြစ်နိုင်တယ်။
- ကိုယ့်နေပုံထိုင်ပုံကြောင့်လား။ ဥပမာ - အိပ်ခါနီး Digital deviceတွေအသုံးပြုမိနေလို့၊ အစားအရမ်းစားလို့၊ သရဲကြောက်လို့၊...
- ပတ်ဝန်းကျင် (Environment) - ကုတင်မာလို့၊ အိပ်စက်တဲ့ပတ်ဝန်းကျင်မသန့်ရှင်းလို့ အနံ့အသက်မကောင်းလို့၊ လင်းနေလို့၊ အသံဆူလို့၊...။
- အကျင့် - အိပ်ရာဝင်ခါနီးတိုင်းပုံမှန်လုပ်တတ်တဲ့အကျင့်တစ်ခုခုကြောင့်လား (ဥပမာ - ဖုန်းအကြာကြီးသုံးတာ၊ ရုပ်ရှင်ကြည့်တာ၊ လေ့ကျင့်ခန်းပြင်းပြင်းထန်ထန်လုပ်တာ၊ ...)
ဒီလိုပြဿနာတွေမဖြစ်ဖို့ ကျနော်ဆို အင်မတန်ဆင်ခြင်ရတယ်။
အိပ်ခါနီးအချိန်ရောက်ပြီဆို ဘယ်လောက်ပဲ ကိစ္စတွေရှုပ်နေပါစေ ပြဿနာတွေရှိနေပါစေ
- အကုန်လုံးကို အဆုံးသတ်၊ Do not disturbနှိပ်၊ စာကြည့်မီးတစ်ခုပဲဖွင့်။
- ရှိရင်းစွဲ အရှုပ်အပွပစ္စည်းတွေ အလျှင်အမြန်အကုန်လုံးသိမ်း၊
- ရေချိုးခန်းထဲ နာရီဝက် တစ်နာရီလောက် ရေချိုး၊ သန့်စင်၊ အိမ်သာတက်၊ သန့်ရှင်းရေးလုပ်။
- အစားအသောက်တစ်ခုခုစားရင်း မီးဖိုချောင်သန့်ရှင်းရေးလုပ်ရင်း ရုပ်ရှင်ဖြစ်ဖြစ် တစ်ခုခုခဏလေးပဲကြည့်။
- ကုတင်ပေါ်ရောက်တာနဲ့ ကြိုက်နှစ်သက်ရာ Sleep musicသံစဥ်လေးတစ်ခုဖွင့်ပြီး အိပ်ပါလေရော။
ဒီလိုroutineတစ်ခုဖန်တီးလိုက်တာက မိမိခန္တာကိုယ်ကိုလဲ အကျင့်တစ်ခုပြုလုပ်ပေးလိုက်ရာကျတယ်။
အလုပ်အကုန်လုံးကို ခေါင်းထဲကထုတ်လိုက်ပြီဆိုတာနဲ့ "ဦးနှောက်ရေ ငါစအိပ်ဖို့လုပ်နေပြီနော်။" ဆိုတဲ့signalပေးလိုက်ပြီ။ တဖြည်းဖြည်းနဲ့ကျင့်သားရလာတဲ့အခါ အဲ့အချိန်အပိုင်းအခြားတစ်ခုကိုရောက်ပြီဆိုတာနဲ့ အိပ်ချင်တဲ့စိတ်ဖြစ်လာမယ် ဒီလိုပါ။
အားကစားလုပ်ပါ။
နွေရာသီတုန်းက ကျောင်းရောအလုပ်ရော သွားဖို့မလိုတဲ့အချိန်ဆိုတော့ အပြင်သွားဖို့အကြောင်းအရင်းကမရှိ၊ စားစရာဆိုလဲ အောက်တင်ရတာဆိုတော့ အိမ်တွင်းအောင်းခဲ့ရတာပေါ့။ အဲ့ကာလတွေတုန်းက ကျနော်လုံးဝအိပ်မပျော်ဘူးဗျ။
ခန္တာကိုယ်ကြီးကအမြဲလေးလံနေတယ်။ အိပ်ဖို့လုပ်တယ် လန်းနေတယ်။ အလုပ်တစ်ခုခုထလုပ်ဖို့လဲ ခွန်အားကမရှိ။ တစ်နေ့တစ်နေ့ ခြေလှမ်းအရေအတွက်က ၅ထောင်သာသာပဲရှိမယ်။ ချွေးဆိုတာထွက်ဖို့နေနေပေါ့ဗျာ။
အခုနောက်ပိုင်းအလုပ်ပဲရှိရှိ ကျောင်းပဲရှိရှိ ဘာရှိရှိ နေ့တိုင်းမနက်တိုင်း Gymသွားတယ်။ အလေးမ ပြေးလွှားဆော့ကစားပေါ့ဗျာ။ ဘယ်သွားသွား နီးရင်လမ်းလျှောက်၊ စက်ဘီးနဲ့သွားလို့ရရင်သွားပေါ့။ အားကစားဆိုရင် ဘယ်ဟာမဆို ကောင်းပါတယ်။
တချို့တွေ အလုပ်အရမ်းများလို့ အိပ်ရေးမဝလို့ စသဖြင့် ငြင်းဆန်တတ်ကြတယ်။ အားကစားလုပ်ဖို့အချိန်ပေးလိုက်လို့ အလုပ်လုပ်မယ့်အချိန်တွေနည်းမသွားပါဘူး။ လုပ်တဲ့အလုပ်တွေက အရင်ထက်ပိုမိုမြန်ဆန်သွက်လက်လာမယ်။ ပိုကောင်းတဲ့ဆုံးဖြတ်ချက်တွေချနိုင်လာမယ်။ ကိုယ့်ကိုယ်ကိုယုံကြည်မှုရှိလာမယ်။
အကောင်းဆုံးစတင်ချင်ရင်တော့ နှစ်သက်လောက်မယ့်ဟာမျိုးတွေကနေစလို့ အကုန်လုံးစမ်းသပ်ကြည့်ပါ။ ရာသီဥတုကောင်းရင် အပြင်ထွက် ပြေးပါ။ မိုးလုံလေလုံအားကစားလုပ်ချင်ရင်တော့Gymဆော့ပါ။ Gymသွားလို့ ချက်ချင်းconfidentဖြစ်သွားမှာတော့မဟုတ်ဘူးဗျ။
ဘာပဲလုပ်လုပ် မှန်ကန်တဲ့ရည်မှန်းချက်နဲ့လုပ်ပါ။ Gymဆော့နေချိန် ရေသာမခိုပါနဲ့ ဓာတ်ပုံတွေချည်းမရိုက်ပါနဲ့ သေချာမဆော့ဘဲ အမှုန့်တွေသောက်ဖို့လောက် Trainerတွေ ဆော့တဲ့သူတွေအချင်းချင်းစကားပြောဖို့ flirtဖို့လောက်ပဲမတွေးပါနဲ့။ ဗလကြီးဖို့ ရုပ်ချောဖို့ ပုံထဲလှဖို့လဲမဆော့ပါနဲ့။
ပြောင်းလဲမှုဆိုတာ ချက်ချင်းမဖြစ်ဘူးဗျ အချိန်ယူရပါတယ်။
အာဟာရ
လက်ထဲမှာ ငွေရှိတယ်။ တစ်လလုံးခေါက်ဆွဲခြောက်စားပြီး ပိုက်ဆံအမြောက်အများစုလို့ရတယ်။ အာဟာရပြည့်တဲ့အစားအသောက်တွေစားသောက်ပြီး ပိုက်ဆံနည်းနည်းလေးပဲ စုလို့လဲရတယ်။ ဘာလုပ်ကြမလဲ။
အစားအသောက်ရဲ့တန်ဖိုးဆိုတာ အိပ်စက်ခြင်းမှမဟုတ်ပါဘူး ခန္ဓာကိုယ်တစ်ခုလုံးရဲ့ဖြစ်စဥ်အတွက်အရေးပါတယ်။ အစာအိမ်(Stomach)ကို လူရဲ့ဒုတိယဦးနှောက်လို့ သမုတ်ကြတယ်။ သူ့ကောင်းရင် အကုန်အဆင်ပြေတယ် မကောင်းရင် ဘာတစ်ခုမှ မပြေဘူး။
ဘယ်လောက်ပဲ အိပ်ရာစောထထ ဘယ်လောက်ပဲ အလေ့အကျင့်ကောင်းတွေပဲကြိုးစားတည်ဆောက်ဆောက် သေချာမစားသောက်ရင် ဘာမှမထူးခြားဘူးဗျ။
အစားအသောက်ကိုဖြစ်သလိုပဲစားသောက်နေသလား သတိတရနဲ့ သေသေချာချာစားသောက်နေလားဆိုတာ မိမိကိုယ်ကိုဆန်းစစ်ကြည့်ပါဗျ။ ကိုယ်စားနေတဲ့အရာတွေထဲမှာ အာဟာရပြည့်ဝတာဘာပါဝင်သလဲ။
- ဆိုးဆေး၊ တာရှည်ခံဆေး၊ ဓာတုဗေဒ စတဲ့Additivesတွေ၊
- မျိုးစုံသောနည်းလမ်းတွေနဲ့ ပေါင်းစပ်ဖန်တီးပြုလုပ်ထားတဲ့Processed foodတွေ၊
- ကျန်းမာခြင်းရယ်လို့ကို မရှိမှန်းသေချာနေတဲ့အစားအသောက်တွေ။
သေချာချင့်ချိန်စားသောက်စေချင်တယ်။ အကောင်းဆုံးနည်းလမ်းကတော့ သဘာဝအတိုင်းစိုက်ပျိုးသန့်စင်ထားတဲ့ အသီးအရွက်တွေကိုဦးတည်စားသောက်စေချင်တယ်။ အသားကြိုက်ရင်တော့အသားစားပေါ့။
ကိုယ့်ပြည်မှာကတော့ ကိုယ်တိုင်ချင့်ချိန်စိုက်ပျိုးရုံမှတစ်ပါး သဘာဝအတိုင်းရနိုင်ဖို့ မလွယ်ကူ၊ တတိုင်းတစ်ပါးမှာဆိုရင်တော့ Organicဖြစ်တာလေးတွေရွေးချယ်ဝယ်ယူ၊ Local Marketတွေ တောင်သူလယ်သမားတွေ စိုက်ပျိုးသူတွေကနေ ကိုယ့်ဆီတိုက်ရိုက်ပို့ဆောင်ပေးတာမျိုးတွေကို အဓိကထားဝယ်။
ကိုယ့်ခန္တာကိုယ်ကလဲ သိတယ်ဗျိုး။ အာဟာရပြည့်ဝတဲ့ဟာမျိုးဆို ချိုမြိန်တယ်။ စားလို့ ကောင်းမှကောင်း။ ဗိုက်ထဲရောက်သွားရင်လဲ နေလို့ကောင်းတယ်။ အိမ်သာသွားရင်လဲ လွယ်လွယ်ကူကူပါပဲ။
ဒီလောက်အဆင်ပြေနေမှတော့ အိပ်လို့ ဘယ်မကောင်းဘဲနေမလဲဗျာ။
အဆုံးသတ်
အခုနောက်ပိုင်းတော့ ကျနော့်အတွက် တစ်နေ့တစ်နေ့ထရတာအင်မတန်လွယ်ကူလာတယ်။ စောလဲ အိပ်ဖြစ်လာတယ်။ နေ့ရက်တိုင်းက အသစ်အသစ်သော challengeတွေကိုရင်ဆိုင်နိုင်ဖို့ ခွန်အားအပြည့်ဖြစ်လာတယ်။ လူတွေကတော့ လိုက်လိုက်ရှုပ်နေသေးတယ်။ ဒါလဲ မှုစရာမရှိ။ ကြိုက်တဲ့ပြဿနာ ကြိုက်တဲ့အခက်အခဲလာထား ကျော်ဖြတ်လိုက်မယ်။
လူတစ်ယောက်က ကိုယ့်ကို သေနတ်နဲ့လာထောက်ရင်ဘာလုပ်မလဲ။ အညံ့ခံမလား သို့မဟုတ် မရရအောင် ပြန်တုန့်ပြန်မလား ။ ဒီမေးခွန်းရဲ့အဖြေကိုလဲ တိတိကျကျဖြေနိုင်သွားမယ်။ သဘောပြောတာနော်။ ယုံကြည်မှု Confidentပါပဲ။
