ဘဝကြီးကိုစိတ်မပျက်မိစေနဲ့။

ဘဝကြီးကဗျာ နေရတာကလဲ သိပ်ပြီးပျော်ရွှင်ဖို့ကောင်းနေတဲ့ဘဝမဟုတ်ဘူး။ မိသားစုနဲ့နေရတဲ့သူက တစ်ဦးတည်းနေချင်တယ်။ တစ်ဦးတည်းဖြစ်နေတဲ့သူကမိသားစုကိုလိုချင်တယ်။

လမ်းလျှောက်နေကြသူက ခြေထောက်ညောင်းလို့ စက်ဘီးစီးချင်တယ်။ စက်ဘီးစီးရတဲ့သူက မိုးမိမှာစိုးလို့ ကားစီးချင်တယ်။ ကားရှိတဲ့သူက ပြိုင်ကားလိုချင်တယ်။ ပြိုင်ကားစီးတဲ့သူက အရင်တုန်းကလို လွတ်လွတ်လပ်လပ်လျှောက်သွားချင်တယ်။

တောင့်တမှုဆိုတာ ဘယ်လိုမှ ပြည့်စုံနိုင်မယ့်အရာတစ်ခုမဟုတ်ပါဘူး။ ဒီတော့ ဘာကြောင့်မပျော်ရတာလဲ၊ ပျော်ရွှင်အောင်ဘယ်လိုနေထိုင်ရမလဲ။

ငယ်ဘဝကို ပြန်လည်ရှာဖွေပါ။

အခုရက်ပိုင်း ကိုယ့်ကိုယ်ကို ပိုမိုဆန်းစစ်ဖြစ်လာတယ်။ နေ့ရက်တိုင်းကိုစမ်းသပ်မှုတစ်ခုလိုသဘောထားတယ်။ ဒီနေ့ငါစောထမယ်။ ခန္တာကိုယ်ကဘာတွေပြောင်းလဲသွားလဲ။ အိပ်ချင်နေလား။ အလုပ်ကောပိုလုပ်နိုင်သလား။ ဘယ်အချိန်မှာ စအိပ်ချင်လာလဲ၊ ဘယ်အချိန်အင်မတန်ပင်ပန်းနေပြီလဲ။

တစ်ခါတစ်လေ ကိုယ်လုပ်နေကြအလုပ်တွေက ဘာအတွက်လုပ်လို့လုပ်နေမှန်းမသိကြတော့ဘူး။ ငယ်ငယ်တုန်းက မိမိကိုယ်ကိုပြန်ကြည့်မိလိုက်တာနဲ့ "ငါဘာတွေပြောင်းလဲသွားပြီလဲ" ဆိုတဲ့စိတ်နဲ့တင် ယူကြုံးမရဖြစ်တတ်ကြတယ်။

တကယ်တော့ ပြန်သွားဖို့နည်းလမ်းတွေရှိပါတယ်။ ငယ်ငယ်တုန်းက ကလေးလေးက ဘာတွေလုပ်ရင်ပျော်တတ်လဲ။ ဘယ်အစားအသောက်တွေကြိုက်တတ်လဲ။ ဘယ်အရာတွေသူလုပ်ချင်လဲ။

တစ်ဦးနဲ့တစ်ဦးကတော့ ဘယ်တူညီနိုင်ပါ့မလဲ။ ကျနော်ဆို စဥ်းစားမိသလောက် အစားအသောက်လေးတွေ ကိုယ့်ဟာကိုယ်ချက်ရရင်ကြိုက်တယ်။ အခုလိုနိုင်ငံခြားမှာ မြန်မာအစားအသောက်နည်းပါးတဲ့အချိန်ဆို ပိုလွမ်းတယ်။ ပဲပြုတ်နံပြားတို့ ပဲပလာတာတို့ ပဲပြုတ်ထမင်းတို့ပေါ့။ ဒီတော့ မရမကလိုက်ရှာပြီး တူအောင်လိုက်လုပ်စားကြည့်တယ်။ ပျော်ဖို့ကောင်းပါတယ်။

တစ်ခါတစ်လေ ဘောလုံးတွေ ပတ်ကန်တယ်။ ပြေးတယ်။ သီချင်းတွေ အကျယ်ကြီးအော်ဆိုလိုက် နဲ့ပေါ့။ အဓိကက လုပ်ချင်ခဲ့တဲ့အရာတွေကိုပြန်စဥ်းစား။ အခုအချိန် ပြန်လုပ်ကြည့်ကြည့် ပျော်ရွှင်ပါလိမ့်မယ်။

Toxicဖြစ်တဲ့အသိုင်းအဝိုင်း.

မိမိကိုယ်ကို surround လုပ်တဲ့ပတ်ဝန်းကျင်ကိုရွေးချယ်ခွင့်ရှိတယ်။

ဆိုပါစို့ သင်က ပတ်ဝန်းကျင်တစ်ခု အသိုင်းအဝိုင်းတစ်ခုကြားထဲ နစ်မြုပ်နေတယ်။ အဲ့လိုမျိုးသူတွေနဲ့လဲ ကိုယ်တူတူမနေချင်ဘူး။ ဒါပေမယ့်လဲ သူတို့နဲ့မဆက်ဆံရင် တစ်ခုခုထိခိုက်မယ် အဆင်မပြေဘူး ဆက်နေနေမှရမယ်ပေါ့။

ဥပမာ - ဟန်ဆောင်မျက်နှာဖုံးတွေအပြည့်နဲ့ ဆက်ဆံနေထိုင်ရတာကို နှစ်ခြိုက်တဲ့သူရှိတယ်။ မကြိုက်တဲ့သူရှိတယ်။ သည်းခံလို့ကိုမရတဲ့သူရှိတယ်။ ကိုယ်က ဘယ်လိုမှနေရတာအဆင်မပြေဘူးဆို သေချာတာတစ်ခုကတော့ စစ်မှန်တဲ့ပျော်ရွှင်မှုရတော့မှာမဟုတ်။ ဒီတော့ ဘာလုပ်ရမလဲ။

တကယ်တော့လေ သည်းခံတိုင်းလဲ အဆင်ပြေတာမှမဟုတ်တာ။ ကိုယ့်ဘဝကွာ ကိုယ်ကိုယ်တိုင်ရွေးချယ်ခွင့်ရှိကိုရှိတယ်။ ဘယ်လိုသူတွေနဲ့ပတ်သက်မယ် ဘယ်လိုသူတွေနဲ့မပတ်သက်ဘူး။

လူတစ်ဦးချင်းစီမှာ မတူညီတဲ့ preference(နှစ်သက်မှု)ဆိုတာရှိတယ်။ လူတိုင်းမတူညီနိုင်ဘူး။ ကိုယ့်ကိုယ်ကို သတိထားကြည့်ကြည့်။ ကိုယ်ဘယ်လိုစကားတွေပုံမှန်ပြောလေ့ရှိလဲ၊ ဘယ်လိုအပြုအမူအနေအထိုင်တွေရှိလဲ။ ဘယ်လိုသူတွေနဲ့ ပိုပြီး ခင်မင်ရင်းနီးဖြစ်လဲ။ ဘယ်လိုသူတွေနဲ့ ဆန့်ကျင်ဘက်အဖြစ်ရှိနေတတ်လဲ။

ပျော်ရွှင်မှုကို တောင့်တခြင်း။

ဦးနှောက်က ပျော်ရွှင်ဖို့နည်းလမ်းအမျိုးမျိုးရှာဖွေပါလိမ့်မယ်။ ပိုက်ဆံရှိတဲ့သူက ပိုက်ဆံနဲ့အလဲအထပ်လုပ်ချင်တယ်။ ကျရှုံးနေတဲ့သူက အနိုင်ရဖို့ကြိုးစားကြတယ်။ သံစဥ်တွေနဲ့ မြူးထူးကခုန်ပေါက်ကြတယ်။

နည်းလမ်းအလွဲလေးတွေဖြစ်လာတဲ့အခါ ပျော်ရွှင်မှုကို လွဲမှားစွာရယူချင်လာကြတယ်။ ခဏတာပျော်ရွှင်မှုလေးတွေ တောင့်တလာတယ်။

လောင်းကစားလုပ်လာတယ်။ လောင်းကစားဆိုတာ ဘာမဟုတ်တဲ့အလဲအထပ်လေးတွေကနေစလို့ ငွေပမာဏအမြောက်အများ၊ အဲ့ကနေ ကိုယ့်လက်ထဲမှာမရှိတဲ့ငွေတွေအထိလုပ်လာတယ်။ သူငယ်ချင်းမိတ်ဆွေတွေနဲ့ အခင်အမင်ပျက်တယ် ပျက်စီးတယ်။

အစားအသောက်ကြိုက်တဲ့သူက ဝအောင်စားတယ်။ အစားအသောက်နဲ့ပဲစိတ်ဖြေရင်းနဲ့ အဝလွန်တာတွေဖြစ်လာတယ်။

လိင်အပျော်အပါးကိစ္စတွေနှစ်သက်တဲ့သူက ရှုပ်မှာမကြောက်တော့ဘူး။ ဘာဖြစ်လဲ ဆေးသောက်လိုက်လို့ရတာပဲ ဒီခေတ်မှာ အရာရာကလုပ်လို့ရနေတာပဲလေ။ သူများတွေလဲလုပ်နေကြတာပဲဥစ္စာ။

ရေတိုပျော်ရွှင်မှု။

ရေရှည်ပျော်ရွှင်မှုရစေဖို့ဘာလုပ်ရမလဲ။

ကျန်းမာအောင်နေပါ။ ဒါအရေးကြီးဆုံးပါ။

ကိုယ်ခန္တာကျန်းမာအောင်နေ စိတ်ကျန်းမာအောင်နေ ပျော်ရွှင်အောင်နေ။ ခန္တာကိုယ်ကျန်းမာဖို့ အစားအသောက်ကောင်းကောင်းသေချာစားသောက်ရမယ်။ သေချာအိပ်စက်အနားယူရမယ်။ အမြဲတမ်းသွက်လက်လန်းဆန်းနေတဲ့သူတစ်ဦးဖြစ်ဖို့ လေ့ကျင့်ခန်းလုပ်ရမယ်။

ခန္တာကိုယ်ကျန်းမာနေရင် စိတ်ညစ်ဖို့အကြောင်းအရင်းအတော်များများလျော့နည်းသွားတယ်။ စိတ်ကျန်းမာရေးအတွက်လဲ လိုအပ်တဲ့ပြောင်းလဲမှုတွေ အလေ့အကျင့်တွေအမြဲ မွေးမြူပေးနေရမယ်။

စိတ်ညစ်စေတဲ့အကြောင်းအရင်းတွေ အရေးမကြီးတဲ့ကိစ္စရပ်လေးတွေအကုန်လုံးကို လျော့သထက်လျော့နည်းလာအောင်ကြိုးစားရမယ်။ မလိုအပ်ဘဲနဲ့စိတ်ညစ်မနေဖို့၊ ကိစ္စတိုင်းကို အပြစ်တင်ရှုံ့ချပြီးညစ်ထေးမနေဖို့။

အခက်အခဲမရှိတဲ့အခြေအနေ (Comfort zone)ထဲနေနေတဲ့သူတစ်ဦးအဖို့ စိတ်ညစ်စရာဆိုတာရှိလာမှာမဟုတ်။ ပိုပြီး ခက်ခဲလေလေ ပိုပြီးအရင်းအနီးများလေလေ ရတဲ့ဆုလာဘ်ကလဲကြီးလေလေပါပဲ။ ကိုယ့်ကိုယ်ကို အမြဲတမ်းPushနေတဲ့သူတိုင်းအတွက် အခက်အခဲဆိုတာ ဘေးပတ်ဝန်းကျင်ကသူတွေထက် အဆပေါင်းများစွာ ပိုမိုများပြားတယ်။

တန်းမညှိနဲ့ ကိုယ်နဲ့မအပ်စပ်တဲ့သူတွေ ကိုယ့်ရဲ့ကြိုးစားအားထုတ်မှုကို လိုက်မမီတဲ့သူတွေ အနားမှာမနေနဲ့။ ကိုယ်တိုင်က ဘယ်လောက်ပဲ ဖြစ်နိုင်ခြေ potential ရှိရှိ ပတ်ဝန်းကျင်က ကြိုးစားချင်စိတ်မရှိဘဲ ဝါးလုံးခေါင်းထဲလသာနေတဲ့သူတွေဆို ကိုယ်တိုင်လဲ ထိုနည်းလည်းကောင်းဖြစ်ဖို့က အသေအချာပါပဲ။

ဆုံးဖြတ်သင့်တာဆုံးဖြတ်ပါ။ စာအုပ်များများဖတ်ပါ အနားယူပါ ကြိုးစားပါ။ ဒီလိုနည်းနဲ့ပျော်ရွှင်လာမှာပါ။

ကျနော်ပျော်ရွှင်အောင်ဘယ်လိုနေလဲ။

ကိုယ့်ကိုသိပ်ချစ်တဲ့ ချစ်သူရှာလိုက်ပါ။

ကျနော်လားအရမ်းပျော်တယ်လေ ဘာလုပ်လုပ်ပျော်တယ် တော်တန်ရုံစိတ်ညစ်တာမျိုးလဲမရှိဘူး။ ဘာလုပ်လုပ် အတိတ်ကထက် ပျော်စရာကိုကောင်းနေတာမျိုးပေါ့။ နေ့ရက်တိုင်းက ပျော်ဖို့ကောင်းနေလို့လဲမဟုတ်ဘူး။

အပူအပင်ကင်းနေလို့လဲမဟုတ်ဘူး။ စဥ်းစားကြည့်ပေါ့ဗျာ ကုန်ကျစရိတ်အများပြားဆုံးမြို့တစ်မြို့မှာ ခက်ခဲလှသတဲ့ ဘာသာရပ်တစ်ခုကို ဘာအခြေခံမှမရှိဘဲသင်ကြားရင်း တစ်ဖက်မှာအခုလိုမျိုးpageတို့volunteerကိစ္စတို့အပါအဝင် social life, ကျန်းမာရေး၊ အစားအသောက်၊ အနေအထိုင် အကုန်လုံးကို ဘက်မျှအောင်manageရတာ ဘယ်လောက်လွယ်ကူနေမှာမို့။

သူမတူတဲ့ အခက်အခဲတွေ အတိုက်အခိုက်တွေ ကြုံလာရတိုင်းသာစိတ်ညစ်ကြေးဆို မိုးထက်တို့ ဆယ်စုနှစ်တစ်ခုတောင် လူ့လောကမှာ ရှင်သန်လိုက်ရမှာမဟုတ်။

လောကကြီးမှာ အသက်ရှင်သန်နေဖို့ဆိုတာ ဆန်ရေတက်နေသလိုပဲ။ ဆန်ရေတက်နေတုန်း မလှော်ဘဲနေရင် လှေက ရပ်နေမှာမဟုတ်ဘူး နောက်ကိုပြန်ဆုတ်သွားမှာ။ အဲ့လိုပဲဘာမှမစားမသောက်အသက်မရှူဘဲ ငုတ်တုတ်နေရင် ဒီအတိုင်းဘဝကြီးက ရပ်နေမှာမဟုတ်ဘူး။ နောက်ပြန်ဆုတ်လာမှာ။ တည်ဆောက်ထားသမျှအကုန်လုံး တုံ့ဆိုင်းသွားမှာ။

ဒီတော့ ဘယ်လိုစလုပ်သလဲ။

နေ့ရက်တိုင်းကျေနပ်ပျော်ရွှင်နေစေဖို့ ကျန်းမာတဲ့ခန္တာကိုယ်တစ်ခုပိုင်ဆိုင်နိုင်အောင် ကြိုးစားတယ်။

• အစားအသောက်ဆင်ခြင်စားသောက်တယ်။ အသီးအရွက်နဲ့whole foodကို များများစားသောက်တယ်။
• နေ့စဥ် ၂နာရီခန့် လေ့ကျင့်ခန်းလုပ်တယ်။ စက်ဘီးစီးတယ်။ လမ်းလျှောက်တယ်။ meditateလုပ်တယ်။ Active lifestyleပေါ့.
• မကောင်းတဲ့အကျင့်တွေ (social mediaအသုံးပြုတာ၊ Instagram, YoutubeTik tokတို့ကို မသုံးသင့်တဲ့ပုံစံတွေနဲ့သိပ်သုံးတာ၊ Partyတွေclubbingတွေလုပ်တာ...)စတဲ့ အောင်မြင်မှုကို ရပ်တန့်စေတဲ့အကြောင်းအရင်းတွေ လုံးဝရပ်တန့်လိုက်တာ။

အရေးအကြီးဆုံးလို့ယူဆတဲ့အရာတွေပေါ့။ တခြားသော ကိုယ့်ကိုယ်ကို စိတ်မညစ်စေဖို့ လုပ်ရမယ့်အရာတွေဆို ရေးလို့ကုန်တော့မှာမဟုတ်ဘူး။ ကျနော်စိတ်ညစ်တတ်ပါတယ်။ စိတ်မညစ်အောင်လဲနေတတ်ပါသေးတယ်။ မခက်ခဲပါဘူး။ ဘဝကို အနိုင်ပိုင်းပြီးဖြတ်သန်းပါ။