Confidenceရှိအောင် ဘယ်လိုနေထိုင်ရမလဲ
လူ့ဘဝမှာရှင်သန်ရတာခက်ခဲတယ်။ လူကောင်းတွေအတွက် ပိုခက်ခဲတယ်။ ဘာလုပ်လုပ် အပြောခံမြဲခံနေရဆဲပဲ။ ဒီတော့ ဒီလိုသူတွေကြားထဲ ဘယ်လိုရှင်သန်ရမလဲ။
မိတ်ဆွေတစ်ဦးက ကျနော့်ကို မေးခွန်းထုတ်လာတယ်။ သူအရင်ကဆို စကားပြောဆိုငြင်းခုန်ရတာကျေနပ်တယ်။ မှန်တာအတွက် ငြင်းခုန်နေရရင် ဘယ်တော့မဆို confidenceအပြည့်ပဲ။
အခုတော့ လူတွေနဲ့စကားမပြောရဲဘူး မပြောချင်ဘူး စိတ်ညစ်နေတယ် ယုံကြည်မှုမရှိဘူး Confidence မရှိဘူး။
လူတွေနဲ့ ဘယ်လိုဆက်ဆံရမလဲ။ စိတ်မလုံခြုံမှု (insecurities)တွေ၊ ကြောက်စိတ်တွေမရှိဘဲ လူ့လောကကြီးထဲ ယုံကြည်မှုရှိရှိ ဘယ်လိုနေထိုင်ရမလဲ။
လူတွေနဲ့ဆက်ဆံရေး။
ကိုယ့်အကြောင်းကို မပြောခင်မှာ လူတွေနဲ့ဆက်ဆံမှုကို ပြောချင်တယ်။
အခုနေ သင်သည် ချစ်တဲ့ခင်တဲ့သူတွေ မိတ်ဆွေအစစ်တွေ သူငယ်ချင်းအစစ်တွေ ရှိနေတယ်။
- ကိုယ့်ရဲ့ဖြစ်တည်မှုကို အသိအမှတ်ပြုတဲ့သူ၊
- ကိုယ့်ရဲ့ပန်းတိုင်တွေကို အရောက်လှမ်းနိုင်အောင် ကူညီပေးမယ့်သူ၊
- ကျဆုံးနေချိန်မှာ ပြန်ထနိုင်အောင် တုံးတိုက်တိုက် ကျားကိုက်ကိုက် ပြုပြင်ပေးမယ့်သူမျိုး ရှိတယ်ဆိုရင် သင်လူဖြစ်ပြီလို့ ဆိုနိုင်ပါတယ်။
ခက်တာက အဲ့လိုသူမျိုးထက် ကိုယ့်ကို ဖျက်လို့ဖျက်ဆီးလုပ်မယ့်သူတွေကအခုခေတ်မှာ များပြားနေတာပါပဲ။
စဥ်းစားကြည့်ကြည့်ပေါ့ဗျာ။ အလုပ်ဆိုလဲအလုပ် ကျောင်းဆိုလဲကျောင်း အကုန်လုံးက အပေါ်ယံဆန်လာတယ်။ အရှိတိုင်း အပြည့်အဝနေဖို့ဆိုတာ အင်မတန်ကြိုးစားရတဲ့အရာတစ်ခုဖြစ်လာတယ်။ အရိုးသားဆုံးနေရင်လဲ အဲ့ရိုးသားမှုကို အသုံးချကြတဲ့သူ နောက်ကျောကိုဓားနဲ့ထိုးချင်တဲ့သူက များတာကိုး။
ဟန်ဆောင်ရပါများလာတော့ ပင်ပန်းလာတယ်။ပျက်စီးလာတဲ့ လူ့အသိုင်းအဝိုင်းကို စိတ်ကုန်လာတယ်။ မုန်းတီးလာတယ်။ ဒီလူတွေကြားထဲမနေချင်တော့ဘူး ထွက်ပြေးချင်လာတယ်။
society ကြားဝင်မဆံ့ခြင်းကို ကိုယ့်အမှားလို့မြင်လာတယ်။ အများနဲ့တစ်ယောက်ထဲက "တစ်ယောက်" ဆိုတဲ့ဘက်က ဖြစ်လာတယ်။ လူတွေရဲ့အဝေး နေချင်လာတယ်။ လူတွေကိုမယုံကြည်ရဲတော့ဘူး။
ကိုယ်တိုင်မကောင်းတဲ့သူဖြစ်နေတာ
သင်က အမှားကို အမှန်ပြင်နိုင်လျက်နဲ့ မပြုပြင်ဘဲ ဒီအတိုင်းနေနေမိလား။
- မှားနေမှန်းသိလျက်နဲ့ အတင်းဇွတ်လုပ်မိနေတာ၊
- မကောင်းတဲ့အကျင့်တွေ ဆက်လုပ်နေမိတာ၊
- ရှေ့မဆက်သင့်တဲ့ကိစ္စတွေ ဆက်နေမိတာ။
ဥပမာ - ကိုယ်က အင်မတန်စိတ်မလုံခြုံတဲ့ Insecureဖြစ်တဲ့သူ။ ဆတ်ဆတ်ထိမခံတဲ့သူ။ ဒီအကျင့်ကြောင့်ပဲ ချစ်ရတဲ့သူတွေနဲ့လဲ ဝေးခဲ့ပြီးပြီ။ တခြားသူတွေကမြင်တော့ ထောက်ပြတယ်။
"မိုးထက် နင်emotionတွေ သိပ်များမနေနဲ့။ ပန်းနုသွေးမနေနဲ့"
ဒါပေမယ့် ကိုယ်က မပြုပြင်ဘူး။ မှားတယ်လို့မမြင်ဘူး။ မကောင်းမှန်းသိလျက်နဲ့ ဆက်ပိုက်ထားတယ်။ ရှေ့ဆက် ထိခိုက်မယ့်သူကကိုယ်ပဲလေ။
ထိုနည်းလည်းကောင်း ဘယ်ကိစ္စမဆို တခြားသူတွေအကုန်လုံးကို လိမ်လို့ရတယ်။ မျက်နှာပြောင်ပြောင်နဲ့ နေလို့ရတယ်။ ငါမသိဘူး ငါဘာမှမလုပ်ဘူး ငါအပြစ်ကင်းစင်တယ် innocentပါတယ်ပေါ့။
ဒါပေမယ့် ကိုယ့်ဟာကိုယ်တော့လိမ်လို့မရဘူး။ မမှန်မကန်နေတဲ့သူတစ်ဦးမှာ ယုံကြည်မှုက ဘယ်လိုမှမရှိနိုင်ဘူး။ ဘာလုပ်လုပ် "ငါလိမ်ထားတာပေါ်သွားမလား၊ လူတွေသိကုန်မလား" ဆိုတဲ့စိတ်နဲ့ အမြဲတစေနေထိုင်နေရတယ် ကိုယ့်ကိုယ်ကို မုန်းတီးလာတယ်။
ဒီလိုသူမျိုးက Confidenceဆိုတဲ့ ယုံကြည်မှု ဘယ်လိုရှိနိုင်မှာလဲ။
အကြောင်းအရင်း
ကိစ္စတစ်ခုဖြစ်တိုင်း Why (ဘာကြောင့်ဖြစ်တာလဲ) ဆိုတာသိမှ Solution (အဖြေ)ကိုထုတ်နိုင်လိမ့်မယ်။ ဒီတော့ ဘာလို့ "Confidence"မရှိတာလဲ။
ငါဘာလို့ ဒီလိုခံစားနေရတာလဲ။ ဒီလိုခံစားလာရအောင် ဘယ်အရာတွေကပံ့ပိုးနေလဲ။ ဥပမာ - စိတ်/ခန္တာကျန်းမာရေး၊ Stress၊ အိပ်ရေး။ ဒါမှမဟုတ် နေ့စဥ်လုပ်နေကြအကျင့်တစ်ခုခုကြောင့်လား။
When - ဘယ်လိုအချိန်တွေမှာ ဒီလိုConfidence မရှိဘူးဆိုတာဖြစ်တာလဲ။
ဆိုပါစို့ မိန်းကလေးတွေနဲ့စကားမပြောရဲဘူးဆိုရင် ဘာကြောင့်လဲ။ ပြောနေကြမဟုတ်လို့လား။ ဒါမှမဟုတ် မဟုတ်တာတွေပဲ တွေးနေမိလို့လား။ အရင်ရည်းစားတွေကြောင့်လား။
ရုတ်တရက်ကောက်ချက်မချစေချင်ဘူး။ တစ်ခါတစ်လေလဲ လွယ်လွယ်ကူကူနဲ့ အဆင်ပြေသွားသလို တစ်ခါတစ်လေလဲ ခက်ခက်ခဲခဲဖြေရှင်းရတယ်။
ကိုယ့်ကိုယ်ကို ဝမ်းစာဖြည့်ပြီးသွားပြီ စိတ်ဓာတ်ရော ခန္ဓာကိုယ်ပါကျန်းမာကြံ့ခိုင်တဲ့လူတစ်ဦးဖြစ်အောင် ကြိုးစားပြီးပြီ။ ဒါဆို လူတွေရှေ့ စကားပြောရဲအောင် confidenceရှိအောင် ဘယ်လိုကြိုးစားကြမလဲ။
လူတွေရှေ့ဘယ်လို confidence ရှိအောင်နေရမလဲ။
အဖြေကတော့ရိုးရှင်းတယ် လူတွေနဲ့စကားမပြောရဲရင် ပိုပြော ပိုမှား ပိုပြင် ပိုလေ့ကျင့်ရမယ်။ အကောင်းဆုံးကတော့ ပြောချင်တဲ့အကြောင်းအရာနဲ့ပတ်သက်ပြီး သိထားရမယ်။
လူတစ်ဦးနဲ့ စကားပြောတိုင်း အကြောင်းအရာတစ်ခုလေ့လာကြေးဆို ခက်ရချည်ရဲ့။ ဒီအတွက် အကောင်းဆုံးကတော့ ဗဟုသုတကြွယ်ဝအောင်
- Fictionဖြစ်စေ Non-Fictionဖြစ်စေ စာအုပ်ဖတ်ပါ။
- Podcastတွေ audiobookတွေ နားထောင်ပါ။
ကိုယ့်Knowledgeကို ပိုမိုဖြန့်ကျက်ပါ။ ပြည်တွင်းနိုင်ငံ့အရေး၊ ပြည်ပနိုင်ငံ့အရေး၊ စီးပွားရေး၊ လူမှုရေး လေ့လာနိုင်စွမ်းကောင်းတဲ့သူ၊ဗဟုသုတကြွယ်ဝတဲ့သူတစ်ဦးက သာမန်သူတစ်ဦးထက် ပိုမိုယုံကြည်မှုရှိပါလိမ့်မယ်။
ဒီလိုနဲ့ လူတွေကို ခွဲခြားသိမြင်တတ်သွားမယ်။ ဘယ်သူကတော့ ရင့်ကျက်တယ်။ ဘယ်သူကတော့ စကားပြောရတာလွတ်လပ်တယ်။ ဘယ်သူကတော့ မလွတ်လပ်ဘူး။ ဒီလိုနဲ့ လူ့အသိုင်းအဝိုင်းအကြောင်း ပိုမိုနားလည်လာမယ်။
လူ့အသိုင်းအဝိုင်းထဲက မိမိကိုယ်တိုင်ကကော ဘယ်လိုပုံစံအနေနဲ့ နေထိုင်နေလဲ။ သူများတွေက ကိုယ့်ကို ဘယ်လိုမြင်လဲ။ အရမ်းတော်တဲ့သူလို့မြင်လား စုတ်ပဲ့နေတဲ့သူလို့မြင်လား။ နားလည်လာမယ်။
တစ်ဖက်လူ
နောက်တစ်ခုကတော့ ကိုယ်နဲ့ပြောနေတဲ့သူကို လေ့လာပါ။ တစ်ဖက်လူက
- ဘာမှသိပ်မသိတဲ့ကလေးသေးသေးလေးလား၊
- ရွယ်တူတွေလား၊
- ကိုယ့်ထက် အတွေ့အကြုံပိုမိုမြင့်မားတဲ့ နယ်ပယ်အသီးသီးက ပိုတော်တဲ့သူတွေလား။
ကိုယ်ပြောလိုက်တာက အဓိပ္ပာယ်တစ်ခု သူတို့နားထဲရောက်သွားတာက အဓိပ္ပာယ်တစ်ခုဆို ဘယ်အဆင်ပြေပါ့မလဲ။ တစ်ဖက်သားအကြောင်းကို နားလည်တဲ့အခါ ပြောချင်တဲ့စကားတွေက ထိရောက်ပါလိမ့်မယ်။
တဖြည်းဖြည်းနဲ့ စိတ်ကူးတွေကနေ စကားလုံးတွေဖြစ်လာတယ် ကိုယ့်စကားတွေနဲ့ လူတွေကို ပိုမိုစည်းရုံးနိုင်လာမယ်။ လွှမ်းမိုးနိုင်လာမယ်။ ဒီလိုနဲ့ မိမိကိုယ်ကိုယုံကြည်မှုရှိတဲ့သူတစ်ဦး လူတွေနဲ့စကားပြောရဲတဲ့သူတစ်ဦး ဖြစ်လာမယ်။
အဆုံးသတ်အမှာစကားလေး
လူ့လောကကြီးထဲရှင်သန်ဖို့ဆိုတာ အတိုက်အခိုက်အတွန်းအလှဲတွေ အများမှအများကြီးပဲ။ အအောင်မြင်ဆုံးသူတွေမှာ အမုန်းဆုံးသောသူတွေ အများမှအများကြီးပဲ။ ဘယ်လောက်ပဲ ယုံကြည်မှုရှိနေနေ ယုံကြည်မှုပျက်ပြားဖို့ အကြောင်းတရားတွေက ဖန်လာမှာပဲ။
ဘယ်လောက်ကြီးပဲ ကြိုးစားနေနေ အမြဲမှန်တဲ့သူဆိုတာမရှိဘူး။ မှားမှာပါပဲ။ အမှားကို အမှန်ပြင်ဆင်ရင်း ယုံကြည်မှုကို တည်ဆောက်ကြရတာပါ။ သူများလာပေးလို့လဲမရဘူး။ မိမိကိုယ်တိုင်တည်ဆောက်ရတာပါ။
ကိုယ်လုပ်တဲ့အလုပ်က လောကကြီးကိုအကျိုးပြုပါစေ နောင်လာနောင်သားတွေ အကျိုးရှိပါစေ။ ကိုယ့်နှလုံးသားစေရာအတိုင်း ဆုံးဖြတ် လုပ်သင့်တာလုပ်ပါ။ ဒီလိုနဲ့ မုချမလွဲမိမိကိုယ်ကိုယုံကြည်လာပါလိမ့်မယ်။
