စုံစမ်းစစ်ဆေးခြင်း။

တစ်နေ့တုန်းကလေ Onlineကျောင်းဆိုပြီး နာမည်ကြီးလာသယောင် ကျောင်းတစ်ကျောင်းတွေ့လိုက်တယ်။ ကိုယ့်မိတ်ဆွေတွေထဲလဲ တက်မယ့်သူတွေမပါပါဘူးဆိုတာယုံကြည်တယ်။ ပြောချင်တဲ့ကိစ္စကဒီလိုပါ။

အဲ့လိုမျိုးလိုင်းပေါ်မှာရုတ်တရက်ကြီး နာမည်တွေကြီးအောင်လုပ် ပုံတွေတင် Followerတွေယူပြီး နည်းအမျိုးမျိုးနဲ့ ဆွယ်နေရင် သေချာတာတစ်ခုကတော့ တစ်ခုခုလွဲနေပြီဆိုတာပါပဲ။ ကျောင်းတစ်ကျောင်းကိုရွေးချယ်တဲ့နေရာမှာ ဘယ်သူကထောင်ထားလို့ပါတို့ ဘယ်သူကဘာဖြစ်လို့ပါဆိုတဲ့ပုံစံမျိုးနဲ့ ရွေးချယ်လိုက်လို့မရဘူး။ အခုလိုအစိုးမရတဲ့ ခေတ်မှာကျောင်းတစ်ကျောင်းဆိုပြီးတည်ထောင်ဖို့ဆိုတာ အင်မတန်အလားအလာကောင်းသလို ဝင်ငွေလဲရလွယ်တယ်။

ခေတ်ရဲ့လိုအပ်ချက်အရ အခြေခံပညာရေးကောင်းအောင်လုပ်ပြီး နိုင်ငံခြားထွက်ဖို့ အကုန်ကြိုးစားနေတဲ့ထဲမှာ ဒီလိုလိုအပ်ချက်ကိုအကောင်းဆုံးအသုံးချတဲ့သူတွေအများကြီးပဲ။ ကျူရှင်တွေကလဲ နိုင်ငံခြားသင်ရိုးတွေသင်လာတယ်။ စတိတ်ကျောင်းကဆရာမတွေလဲ သင်ရိုးတွေပြောင်းသင်လို့သင် အခုမှအထက်တန်းပြီးတဲ့ကောင်လေးကောင်မလေးတွေလဲ Guideတွေလုပ်လို့လုပ် နိုင်ငံခြားသွားဖို့Agentတွေဆိုရင်လဲ မှိုလိုကိုပေါက်နေရောပဲ။

နိုင်ငံခြားရောက်သွားတာနဲ့ Visaလျှောက်ပေးတယ်ကျောင်းလျှောက်ပေးတယ်ဆိုပြီး ငွေတွေယူလို့ယူ။ သာမန်ပြည်သူတွေကလဲ ကိုယ့်သားသမီး ကိုယ့်ညီငယ်ညီမငယ်အတွက်စိုးရိမ်စိတ်နဲ့ပေါ့။ ဟုတ်တယ်လေ စစ်မှုထမ်းရတာထက်စာရင်တော့ အဖမ်းခံရတာထက်စာရင်တော့ ရှိတာအကုန်ရောင်းပြီးစွန့်စားတာကမှဟုတ်တုတ်တုတ်။

ဒီလိုခေတ်မှာ လိမ်စားတဲ့သူဆိုတာလဲပေါမှပေါ။ လိမ်တယ်ဆိုတာ တိုက်ရိုက်လိမ်တာရှိတယ် သွယ်ဝိုက်ပြီးလိမ်တာရှိတယ်။

၁။ တိုက်ရိုက်

တိုက်ရိုက်ဆိုတာက မျိုးစုံပြောဆိုပြီး ငွေအလွှဲစောင့်ပြီး Blockပြေးတာပါ။ နိုင်ငံခြားငွေတွေလဲပေးတယ်ပြောတယ်။ ကျောင်းလခတွေ ကျောင်းစာမေးပွဲကြေးတွေ သွင်းပေးတယ်။ ဘာလုပ်ပေးတယ်ညာလုပ်ပေးတယ်ဆိုပြီးServiceတစ်ခုခုနဲ့ပေါ့။ ကူညီချင်တာပါတို့ အဆင်မပြေကြမှာစိုးလို့ပါတို့ စသဖြင့်ပါ။

အကောင်းဆုံးကတော့လေ မလုပ်ပါနဲ့။ ဒီလိုကိစ္စတွေက ပြည်ပထွက်မယ့်သူအတော်များများလုပ်ကြသိကြတဲ့ကိစ္စတွေမို့ ကိုယ့်ပတ်ဝန်းကျင်ကသူတွေကိုမေးမြန်းပါ။ နည်းလမ်းရယူပါ။ လိုချင်တဲ့အတိုင်းတော့ရချင်မှရလိမ့်မယ်။ လွယ်ကူချင်မှလွယ်ကူလိမ့်မယ်။ အလိမ်ခံရတာထက်တော့ သာပါသေးတယ်။

၂။ သွယ်ဝိုက်။

ဒါကတော့အများဆုံးရှိတတ်တယ် အနည်းဆုံးကြားရတတ်တယ်။

ဘယ်သူမဆိုပိုက်ဆံလိုချင်ကြပါတယ်။ ဒါပေမယ့် ပိုက်ဆံဆိုတာကိုအဓိကထား အမြတ်အစွန်းကိုအဓိကထားအလုပ်လုပ်တာလား ကျောင်းသားတွေအဆင်ပြေစေချင်ရုံသပ်သပ်လုပ်ပေးတာလားဆိုတာ အင်မတန်သိသာပါတယ်။

ကျောင်းတွေဆိုရင် သင်တန်းတွေဖွင့်တယ် နိုင်ငံခြားသင်ရိုးတွေ၊ နိုင်ငံခြားဘွဲ့၊ နိုင်ငံခြားသွားဖို့အခြေခံ အိုး"နိုင်ငံခြား" ဆိုတာတွေချည်းပဲ။ ဒါပေမယ့် နိုင်ငံခြားဆိုတဲ့ Quality နဲ့Standardကောမီလို့လား။

ဆိုပါစို့ International schoolတစ်ကျောင်း။ ကျောင်းဝတ်စုံတွေ ကျောင်းအသုံးအဆောင်တွေ အဆောက်အဦးတွေ အကုန်လုံးကတော့ ဓနိမိုးနဲ့ထရံကာမဟုတ်ဘူး။ တိုက်ခန်းလေးတစ်ခန်း အဆောက်အဦးလေးတစ်ခုမှာ သင်တယ်။ အများအမြင်မှာတော့ ကျောင်းကသပ်ရပ်သားနားတယ်။ သာမန်ကျောင်းတစ်ကျောင်းထက်သာတယ်။ နိုင်ငံခြားသင်ရိုးသင်ပေးတယ်။ ဒီကကလေးတွေက နိုင်ငံခြားရောက်ကုန်တယ်။ ကောင်းတယ်။

ဒါပေမယ့် ကျောင်းသားတွေကိုပြွတ်သိပ်နေအောင်ထားတယ်။ ဆရာဆရာမနဲ့ကျောင်းသားအင်အားလုံးဝမမျှတဘူး။ ကျောင်းသားတစ်ဦးချင်းစီရဲ့အခက်အခဲတွေ အခြေအနေတွေကို လိုက်မမီဘူး။ ကျောင်းသားတွေက စာများချင်ရင်လဲများတယ် နည်းချင်ရင်နည်းတယ် စာမေးပွဲတွေလဲအများကြီးဖြေရင်ဖြေရတယ်။ ထပ်ရင်လဲထပ်နေတယ်။ ဗြောက်သောက်သင်ရိုးကိုရေးဆွဲထားတယ်။

ဆရာမတွေကလဲ သင်ရိုးသာသင်နေတယ် ထိုစာအုပ်တောင်မနေ့တစ်နေ့ကမှကိုင်ဖူးတာမို့ အဆင့်အတန်းမမီဘူး။ လာဘ်စားတယ်။

ကျောင်းရဲ့အုပ်ချုပ်ရေးပိုင်းကလဲ ကျောင်းသားတွေဘာဖြစ်ဖြစ်စိတ်မဝင်စားဘူး။ ကျောင်းသားတွေများသထက်များလာအောင်ဘယ်လိုလုပ်ရမလဲ၊ Marketing ဆင်းလို့ကောင်းအောင် အားကစားပြိုင်ပွဲတွေ၊ Fairတွေ၊ Eventတွေ ဘယ်လိုမျိုးစီစဥ်ရမလဲ ဒါတွေပဲစဥ်းစားနေပြန်တယ်။

Libraryလို့သာဆိုတယ် ကျောင်းသားတစ်ဦးဖတ်သင့်တဲ့စာအုပ်ဘာတစ်ခုမှမရှိဘူး။ ပြိုင်ပွဲလို့သာဆိုတယ် Marketing campaignတစ်ခုထပ်မပိုဘူး။

ပြင်ပအဖွဲ့အစည်းတွေနဲ့ချိတ်ဆက်ထားတယ်သာဆိုတယ် ကျောင်းသားတွေအတွက်တကယ်အကျိုးရှိမယ့် ကွင်းဆင်းလေ့လာလို့ကောင်းတဲ့နေရာတွေ အတွေ့အကြုံချင်းအဆက်အသွယ်ချင်းဖလှယ်နိုင်မယ့်ကွန်ယက်တွေ မရှိ၊ စားသောက်ဆိုင်မှာ ဘယ်လောက်Discountတို့ ဘယ်ဆိုင်မှာ ဘာdiscountတို့ပေါ့။

ဖြေရှင်းခြင်း

အများစုကတော့ မကျေနပ်ရင်တောင် ပုံမှန်ကိစ္စတစ်ခုပဲ ငါတို့ပြောလဲမထူးဘူးလို့သဘောထားလိုက်ကြပါလိမ့်မယ်။ တကယ်လဲမထူးဘူးလေ တိုင်စရာလူလဲမရှိ ရှိတဲ့ပညာရေးဝန်ကြီးဌာနကလဲ အရေးလုပ်နေမှာမဟုတ်။ ကျောင်းတိုင်းဖြစ်တယ်ပေါ့။ ပေးရတဲ့စျေးနဲ့ ဒီလောက်ပဲရမှာပါပေါ့။

အနည်းစုလောက်သာ ဒီလိုကိစ္စကိုတစ်ခုခုActionယူလိမ့်မယ် (တာဝန်ရှိသူကိုတိုင်တာ၊ အများသိအောင်ထုတ်ဖော်ပြောကြားတာ၊ မိတ်ဆွေအချင်းချင်းWord of mouthနဲ့ မကောင်းကြောင်းပြောတာ၊...)။ ဒီထဲကမှ အသေးအဖွဲလေးလောက်သာ လူသိသွားကြတယ်။ ဒီထဲမှ တကယ့်မဖြစ်စလောက်မှမဖြစ်စလောက်လေးသာ ပြောင်းလဲမှုတစ်ခုဖြစ်သွားတယ်။ ကျောင်းသားတွေအကျိုးရှိသွားတယ်။

အော်ရှိပါသေးတယ်။ကျောင်းနဲ့ပတ်သက်တဲ့ မကောင်းတဲ့Reviewရေးသားလို့ဆိုပြီး ကျောင်းသားကို ကျောင်းကပြန်တရားစွဲတာ။ ကျောင်းသားတွေကတောင်းပန်စာနဲ့ နှုတ်ပိတ်သွားကြရော။ (ဒီလိုကိစ္စတွေကိုကိုင်တွယ်နေတဲ့ အစိုးရလဲမရှိဘူးလေနော်)

ခုနကျောင်းကိစ္စကိုဆက်စပ်ပြောရရင်တော့ ကျောင်းတိုင်းကျောင်းတိုင်းက အပျင်းပြေတက်လို့ကောင်းပါတယ်။ ပေါ့ပေါ့ပါးပါးပေါ့ဘာဖြစ်လဲ ငွေသိန်းဂဏန်း သိန်းဆယ်ဂဏန်းလောက်ကုန်တာ ဘာအရေးလဲ။ တတ်ရင်တတ်မယ် မတတ်ရင်လဲ အပိုပဲဥစ္စာ။ မလုပ်ပါနဲ့ ကိုယ့်ငွေကိုယ်တန်ဖိုးမထားရင်တောင် တက်ရမယ့်သူရဲ့အချိန်ကို တန်ဖိုးထားပါ။ သေချာလေ့လာစုံစမ်းပါ။

စုံစမ်းစစ်ဆေးနည်း

သူနဲ့ပတ်သက်လို့ ကိုယ်ဘာတွေသိထားလဲဆိုတာ ပြန်စဥ်းစားမယ်။ ဘယ်ကသိတာလဲပေါ့။ အပေါ်ယံလေ့လာကြည့်မယ်။

ဒီကျောင်း/အဖွဲ့အစည်းရဲ့Website, Facebook Page, Telegram Page, Youtube စတဲ့နေရာတွေကနေ လေ့လာမယ်။ ကျောင်းဆို သူ့တည်နေရာ၊ ကျောင်းကပေးတဲ့သင်တန်းတွေdiplomaတွေ၊ ကုန်ကျစရိတ်၊ ကျောင်းတက်တဲ့သူတွေရဲ့ ပုံစံအနေအထား backgroundနဲ့သင့်လျော်မလျော်၊ Online/offline,.

ဒီကနေ Facebook groupတွေထဲမှာ ဝင်ရှာကြည့်မယ်။ ကိုယ်စုံစမ်းနေတဲ့ကျောင်းတွေရဲ့ နာမည် အတိုအရှည် Keywordလေးတွေကိုရိုက်ရှာကြည့်မယ်။ Commentတွေဖတ်မယ်။ Shareထားတဲ့သူတွေကိုသွားကြည့်မယ်။ ကျောင်းအကြောင်းရေးသားထားပဲ မှန်မှာပါဆိုတာနဲ့မပြီးစေနဲ့။

၁။ Why ဘာလို့ကောင်းတယ်လို့ရေးထားတာလဲ။

၂။ Who ဘယ်သူကကောင်းတယ်ရေးထားတာလဲ။

၃။ Where ဒီသူက ဘယ်နေရာတွေမှာရော ကောင်းတယ်လို့ရေးသားထားသေးလဲ။

၄။ Is it authentic။ ပိုက်ဆံရလို့ Reviewရေးပေးထားကြတာလား။ သူက ကျောင်းသားအစစ်၊ မိဘအစစ်လား ကျောင်းဘက်ကနေ အကောင့်အတုနဲ့ ဟန်ဆောင်ရေးသားထားတာလား။

ကျောင်းနဲ့ပတ်သက်တဲ့ကောင်းသတင်းမကောင်းသတင်းအစုံရှိကြပါတယ်။ အထူးသဖြင့် ကျောင်းသားအတက်များတဲ့ Campusရှိတဲ့ နာမည်ကြီးကျောင်းတွေဆို ပိုများပါတယ်။ ပွဲတွေလဲရှိပါတယ်။ ပွဲကြိုက်တဲ့ကိုယ့်လူတို့ စိတ်ကြိုက်မွှေနှောက်နိုင်ပါတယ်။ ဒီအဆင့်မှာတင် အကြမ်းဖျင်းသိသွားကြမှာပါ။ ဒါပေမယ့် အပေါ်ယံပဲရှိပါသေးတယ်။ စုံထောက်လုပ်တာ နောက်တစ်ဆင့်တက်ကြမယ်။

ကိုယ်တိုင်မေးမြန်းခြင်း

ကျောင်းတွေရဲ့Pageတွေမှာ လူပုံတွေရှိတယ်။ Groupတွေထဲမှာလဲ ကျောင်းသားကိုယ်တိုင် ကျောင်းသားမိဘကိုယ်တိုင်ရေးသားတာတွေလဲရှိတယ်။ အပြင်မှာ ပုဂ္ဂိုလ်ရေးအရ သိတဲ့သူတွေ အားမနာတမ်းဖြေပေးမယ့်သူတွေဆိုရင် မေးသာမေးပါ ဖြေပေးချင်ကြပါတယ်။

အပေါ်ယံလောက်သာရင်းနီးတဲ့သူတွေ လုပ်ဖော်ကိုင်ဖက်တွေဆို တော်တန်ရုံမမေးတာကောင်းတယ်။ အာရုံနောက်မခံ "ကောင်းတယ်" ပဲဖြေကြမှာပါ။ (ဟုတ်တယ်လေ ကိုယ်တက်ခဲ့တဲ့ကျောင်း ဘယ်သူကမကောင်းပြောချင်ကြမှာတုန်း။ ကိစ္စတစ်ခုကဘယ်လောက်ကြီးပဲဆိုးခဲ့ဆိုးခဲ့ လူတွေက အမှတ်တရတွေပဲ မှတ်မိချင်ကြတာ)

တစ်ဦးတစ်ယောက်တည်းပြောတာနဲ့ လက်မခံပါနဲ့။ အနည်းဆုံး ၃/၄ယောက်မေးမြန်းပါ။ များရင်များသလောက်ကောင်းပါတယ်။ အမှားပါတတ်ပါတယ် ဘယ်သူမဆို။ အမှားအမှန်ချင့်ချိန်လို့ရလောက်တဲ့ပမာဏအထိ မေးမြန်းကြပါ။ မေးပြီးရင်လဲ ကျေးဇူးတင်ပေးကြပါ။

ဒီလိုသာစစ်ဆေးမေးမြန်းခဲ့မယ်ဆိုရင် ပြဿနာတက်ကြတဲ့အခြေအနေအများစု ပပျောက်သွားမှာပါ။ ဂရုစိုက်ကြပါကိုယ့်လူတို့။