ဘယ်လောက်ပိုက်ဆံရှိမှ နိုင်ငံခြားလွှတ်ဖို့စဥ်းစားသင့်လဲ။

တစ်နှစ်ကို သိန်း ၂၀၀ သိန်း ၃၀၀ လောက်ဆိုတက်လို့ရနေတဲ့ လူသွားအများဆုံး ကုန်ကျစရိတ်အဆင်ပြေဆုံးဆိုတဲ့ ထိုင်းနိုင်ငံတောင်  အနည်းဆုံး သိန်း ၆၀၀ လောက်မှအဆင်ပြေပါတော့မယ်။  ပြည်ပထွက်ဖို့က အင်မတန်ခက်ခဲလာတယ်။ ငွေဘယ်လိုတွက်ဆရမလဲ။​ အခုနောက်ပိုင်း agentတွေကြေညာနေတဲ့ ကျောင်းတွေပြောပြောနေတဲ့ စျေးနှုန်းတွေ၊ လူတွေထင်ထားခဲ့တဲ့ စျေးတွေတော့ဖြစ်မှာမဟုတ်ဘူး။

မဖြစ်နိုင်တဲ့ ကုန်ကျစရိတ်တွေကိုလဲ ကျနော်ဖော်ပြပေးမှာမဟုတ်ဘူး။ Scholarshipတွေလဲမပါဝင်ဘူး။ လူကြိုက်တော့နည်းမယ်။​ မှန်တော့မှန်လိမ့်မယ်။ နိုင်ငံခြားသွားဖို့ ငွေတွက်ပုံတွက်နည်းပါဝင်တဲ့ postထဲမှာတော့ အသေးစိတ် ဘယ်လိုမျိုးနေရာတွေကုန်နိုင်မလဲ၊ လူတွေမှန်းထားတာနဲ့ လက်တွေ့မှာ ကွာဟတဲ့ပုံစံတွေ ဒါတွေကို ကျနော်ရေးသားပြီးခဲ့ပြီ။

ကျပ်ငွေတန်ဖိုးကျဆင်းနှုန်း

အမှန်တိုင်းပြောရရင် ငွေစျေးတက်တဲ့ပုံစံနဲ့အခြေအနေက ကျနော်အပါအဝင်ဘယ်သူမှခန့်မှန်းနိုင်တဲ့အခြေအနေမဟုတ်ဘူး။ မေလ ၂၀၂၄ ကနေ ယခု သြဂုတ်လ ၂၀၂၄အထိ ၃/၄လအတွင်း မည်သည့်နိုင်ငံခြားငွေမဆို၂ဆလောက်တက်သွားတယ်။​ ယမန်နှစ် သြဂုတ်လ ၂၀၂၃ ယခုအချိန်အထိ တစ်နှစ်တာကာလအတွင်းမှာတော့ ယမန် ၃/၄လလောက်ရဲ့ ၄ပုံတစ်ပုံလောက်သာ ငွေအတက်နှုန်းရှိခဲ့ပါတယ်။

ကျပ်ငွေတန်ဖိုးကျဆင်းလာမှုအကြောင်း သတင်းဌာနတွေရဲ့သုံးသပ်ချက်အရ လုပ်ငန်းရှင်တွေတဖြည်းဖြည်းနိုင်ငံခြားသို့ထွက်ခွာကုန်ကာ ပြည်တွင်းမှာလျော့နည်းလျက် ပြည်ပမှာ ရင်းနီးမြှုပ်နှံမှုတွေ များပြားလာတာ၊ ပို့ကုန်သွင်းကုန်မမျှတတာကြောင့် ဆိုကြပါတယ်။​

  နှစ်အလိုက် ငွေလဲနှုန်းတက်တဲ့အချိန်ရယ်လို့ရှိပေမယ့် သေချာတာတစ်ခုကတော့ တစ်လပြီးတစ်လ၊ တစ်နှစ်ပြီးတစ်နှစ်ကျပ်ငွေတန်ဖိုး မလွဲမသွေကျဆင်းလာမှာကတော့သေချာလျက်ပါပဲ။​ ဒီတော့ ဒီနေ့အကြောင်းအရာတွေကို ပိုမိုမှန်ကန်မယ့် USDနဲ့ပြောပြပါမယ်။

အခု သြဂုတ်လ ၁၃ရက်နေ့ ၂၀၂၃ ညပိုင်းမှာတော့

1 USD = ၇၀၀၀ ကျပ်

1 Baht = ၂၀၀ ကျပ်

1 GBP = ၈၄၀၀ ကျပ်

နိုင်ငံအလိုက် ဘယ်လောက်အကြမ်းဖျင်းကုန်ကျတတ်လဲ။

• မိမိရှိရင်းစွဲအခြေအနေကနေ နိုင်ငံခြားကျောင်းလျှောက်လို့ရတဲ့ သင်တန်း/ကျောင်း/စာမေးပွဲအမျိုးမျိုး ကုန်ကျစရိတ်။ (OSSD, A level, GEDစတဲ့ ပြင်ဆင်စရိတ်နဲ့ စာမေးပွဲကြေး၊ IELTS, SATစတဲ့ ပြင်ဆင်စရိတ်နဲ့ စာမေးပွဲကြေး)
• ပြည်ပထွက်ဖို့ ပြင်ဆင်ချိန် ကုန်ကျစရိတ်။ (လေယာဥ်လက်မှတ်၊ အိမ်လခကျောင်းလခစရံခ၊ agentခ၊ visaနဲ့အခြားသော စာရွက်စာတမ်း အာမခံကုန်ကျစရိတ်၊...)
• ကျောင်းစရိတ် (College or Universityစရိတ်ကွာဟချက်၊ Language School သို့မဟုတ် English Second Language ကဲ့သို့ အခြားသော သင်တန်းတစ်ခုခုတက်ရမည့်အခြေအနေ)
• နေစရိတ် (ကျောင်းအဆောင်ဖြစ်ဖြစ် လူနေအိမ်ဖြစ်ဖြစ် Shared roomဖြစ်ဖြစ် အစစအရာရာ ကုန်ကျစရိတ်၊ ပြင်ဆင်စရိတ်၊...)
• စားစရိတ် (ချက်ပြုတ်မှာလား၊ မှာစားမှာလား၊ ဝယ်စားမှာလား၊ အချင်းချင်းတူတူချက်ပြုတ်ကြမှာလား၊ အလကားရတာမျိုးရှိလား၊...)
• အထွေထွေကုန်ကျစရိတ် (သာမန် ဟိုပြင် ဒီသွား ကုန်ကျစရိတ်ကနေ ဖုန်းတစ်လုံး၊ laptopတစ်လုံး၊ ကားတစ်စီး၊ ဆေးရုံဆေးခန်းအထိရှိနိုင်၊...)

အကြောင်းအရာတွေအများကြီးပေါ်မှာမူတည်ပါတယ် တွက်ဆဖို့တော့ခဲယဥ်းပါတယ်။​ နိုင်ငံအလိုက်၊ ပြည်နယ်အလိုက်၊ မြို့အလိုက်၊ မိမိရှိရင်းစွဲအခြေအနေနဲ့ major အကုန်လုံးပေါ်ကွာခြားနိုင်ပါတယ်။ ကွာခြားချက်တွေကတော့ ကျောင်းမတက်ခင် ပြည်ပမရောက်ခင် သိရနိုင်သလိုမျိုး မိမိရောက်မှသိရတာလဲရှိတာမို့ ပျမ်းမျှစရိတ်ကို အများဆုံးမတွက်ဆထားဖို့ အနည်းဆုံးလို့မတွက်ဆထားဖို့ အရေးကြီးပါတယ်။ ပိုကုန်တာပဲသေချာပေါက်ရှိမှာပါ။

ပြည်ပမသွားခင် ကျောင်းစရိတ် ဘယ်လောက်ကုန်ကျလဲ။

• OSSDဆို USD 10000ကျော်လောက်ကနေ စလောက်မယ်။ 
• IGCSEဆို တစ်လ ၅ သိန်းအနည်းဆုံးကနေစလို့ တစ်လ သိန်း ၃၀/၄၀လောက်ထိ ကျောင်းတွေရှိတယ်။ တချို့တွေ ဒေါ်လာနဲ့တွက်ယူကြတယ်။ ၁နှစ်ခွဲ ကနေ ၂ နှစ်တက်ကြတယ်။ လူကုံထံအသိုင်းအဝိုင်းတက်ကြတဲ့ ကျောင်းတွေဆိုရင်တော့ တစ်နှစ် သိန်း၁၀၀၀ ကျော်ထိရှိမှာပေါ့။
• GEDဆို စာမေးပွဲသီးသန့်မို့လို့ Self studyလို့ရတယ်။ သင်တန်းလဲတက်လို့ရတယ်။ တစ်လကို ၂သိန်း ၃ သိန်းသို့မဟုတ် Courseတစ်ခုလုံးကို ၁၀ သိန်း သိန်း ၂၀။ သင်တန်းပေါ်လုံးလုံးမူတည်တယ်။
• US diploma၊ IB၊ AP စတာတွေကျတော့ ကျနော်နဲ့သိပ်မရင်းနီးတဲ့အတွက် ခန့်မှန်းခြေပြောရခဲယဥ်းပါတယ်။ Creditအလိုက် ကျောင်းအလိုက် ယူသလောက်ပေါ့။

ကျောင်းသားတစ်ဦး နိုင်ငံအလိုက် တစ်နှစ်ကို ဘယ်လောက်ကုန်ကျမလဲ။

• Canadaမှာ ကျောင်းစရိတ် Universityကို CAD 38000(USD 27000) or Collegeကို CAD 20000 (USD 15000), Cost of living - USD  11000 လို့ပျမ်းမျှတွက်လို့ရပါတယ်။ 
• USမှာ ကျောင်းစရိတ် USD 30000 or college USD 15000-20000 ပေါ့။ နေစရိတ်စားစရိတ်ကတော့ USD 10000-15000။ ပိုဖို့ပဲရှိတယ်။
• UKမှာ ကျောင်းစရိတ် Universityကို GBP(£) 15000-20000၊ နေစရိတ်စားစရိတ် GBP(£)12000-15000. (ကျနော့်Oxfordတိို့ Londonတို့ပိုကြီးနိုင်။)
• ထိုင်းမှာ ကျောင်းစရိတ် Baht 150,000 ကနေ Baht 400,000 ထိရှိနိုင်တယ်။​ နေစရိတ်စားစရိတ် Baht 250,000 per year, Baht 20000 per month အနည်းဆုံးပါ။​

ကျောင်းစရိတ်က သေချာပေါက် ၃/၄နှစ်စာ ထောက်ပံ့နေရဦးမယ်။ ဒီလိုပဲ နေစရိတ်စားစရိတ်ဆိုတာလဲ ဘယ်လောက်ကြီးပဲ Part timeရှာနိုင်မယ်/အလုပ်လုပ်နိုင်မယ်/အလုပ်ရှာနိုင်မယ် ပြောပြော အသုံးမပြုရင်တောင် ကိုယ့်ဆီမှာ လိုအပ်လာရင်ပေးနိုင်ဖို့အတွက် သေချာပေါက်ရှိထားရဦးမှာပါ။ ဒီစရိတ်ကို ၃/၄နှစ် အနည်းဆုံးထောက်ပံ့ရပါဦးမယ်။

ဘယ်လောက်ကြာတဲ့အထိ ထောက်ပံ့ပေးရဦးမှာလဲ။​ 

အနည်းဆုံးတွက်ကြည့်ရရင်တော့ 

• ကျောင်းတက်တဲ့ ၃/၄နှစ်အတွက် နေစရိတ်စားစရိတ်ကျောင်းလခအပြည့်အစုံပါ။ 
• Full timeအလုပ်မရခင်အထိ နေစရိတ်စားစရိတ်
• Full timeအလုပ်ရခဲ့ရင်တောင် မလုံလောက်တဲ့အခါထောက်ပံ့စရိတ်
• Masters သို့မဟုတ် လိုင်စင်ရသည့်အချိန် ၅/၁၀နှစ် ကြာတဲ့အထိ တက်မယ့်သူ (သို့မဟုတ်) တက်ရမယ့်majorဆိုရင် ပိုထောက်ပံ့ပေးရပါမယ်။ ဘယ်လောက်ကြီးပဲ အလုပ်ရနိုင်တယ်ပြောပြော အတိုင်းအတာဆိုတာရှိပါတယ်။ 

ဘာတွေအပိုကုန်ကျနိုင်မလဲ။

• သင်ထောက်ကူပစ္စည်းဖိုး(စာအုပ်ဘောပင်ကအစ Laptopနဲ့ PCတစ်စုံစာ အထိ)
• အထွေထွေကုန်ကျစရိတ် (သာမန်ဆင်းကတ်ဖိုးလောက်ကစ ဆေးရုံဆေးခန်းဖိုး၊ Semesterကျတဲ့အတွက် ပြန်လည်တက်ရမယ့်courseတန်ဖိုး၊ အဲ့ကနေ ကျောင်းtripဖိုး ဆိုင်ကယ်တစ်စီး ကားတစ်စီးဖိုးအထိ)
• မဖြစ်မနေကြုံလာသဖြင့် အသုံးပြုရမည့်ငွေ (Visaသက်တမ်းကုန်သဖြင့် visaဖိုး၊ ဆေးရုံဆေးခန်းဖိုး၊ ဆေးဖိုး၊ လျော်ကြေး၊ စာရွက်စာတမ်းဖိုး၊ မဖြစ်မနေပြည်ပထွက်ရတာမျိုး ရန်ကုန်ပြန်လာရတာမျိုးအတွက်အဖိုးအခ)

Part timeကိုမီခိုထားလို့ရနိုင်မလား။

Part timeကနေ ရနိုင်တဲ့limitဆိုတာရှိပါတယ်။ UKမှာ part time ဝင်ငွေချည်းပဲ တစ်လကို £800 လောက်ရနိုင်တယ်။ အဲ့လိုပဲ ကုန်ကျစရိတ်ကျပြန်တော့ တစ်လကို £1300လောက်ရှိတယ် အဲ့လိုဆိုမကာမိဘူးလေ။ Part timeက သေချာပေါက်ရမယ်ဆိုတာအာမခံထားတာမျိုးမရှိတဲ့အတွက် အတိအကျပြောလို့မရဘူး။ ထိုနည်းလည်းကောင်း Part timeလုပ်လို့ အချိန်ပြည့်လုပ်ခွင့်ရနိုင်မယ်၊​ ဝင်ငွေအကုန်လုံးက လက်ထဲကျန်မယ် Part timeကြောင့်ထွက်ငွေရှိမရှိဆိုတာပြောလို့မရဘူး။ 

Scholarshipကော ရရှိနိုင်မလား

Scholarshipရဖို့မှန်းဆကြတယ်။ Scholarshipဆိုတာ လူတွေကို 

“သွားသွားနင်တော်လို့ နင့်အတွက် အလကားငွေပေးမယ်” မဟုတ်ပါဘူး။ ဘယ်သူမှငွေကို အလကားမပေးပါဘူး။ 

အမျိုးမျိုးသော ကုန်ကျစရိတ်တွေ၊ လက်ထဲငွေရှိထားရတာတွေ၊ scholarshipဆီက ရနိုင်တဲ့ငွေကြေးအတိုင်းအတာနဲ့ ပြန်ပြီးပေးဆပ်ရမယ့် စည်းမျဥ်းစည်းကမ်းလိုက်နာမှုတွေရှိပါတယ်။ ဥပမာ Full scholarshipဆိုပြီး ကုန်ကျစရိတ်လုံးဝမရှိဘဲ ဘယ်သူမဆိုတက်လို့ရနိုင်မယ်လို့ ထင်တဲ့scholarshipမျိုးဆို

• မဖြစ်မနေမြန်မာနိုင်ငံပြန်လာရမယ်
• Part timeလုပ်ခွင့်မရှိတာမျိုးတို့ Part timeလုပ်ရင် ငွေလျှော့ပေးမယ်တို့
• အပြည့်အဝဆိုပေမယ့် ရှိသေးတဲ့exceptionတွေတို့ 
• တစ်ခုခုဖြစ်ခဲ့လျှင် ပြန်လျော်ပေးနိုင်မယ့်ငွေကြေး ရှိကြောင်းသက်သေတို့
• Scholarshipမှာပါဝင်တဲ့ terms and conditionsတို့စတဲ့

မိမိအတွက် လိုက်နာနိုင်လောက်တဲ့ စည်းကမ်းနည်းနည်းလေးကနေစလို့ အထိအခိုက်သိပ်များပြီးsensitiveဖြစ်လွန်းလှတဲ့ စည်းကမ်းတွေရှိတတ်ပါတယ်။​ အဆင်မပြေလှပါဘူး။ 

လူတိုင်းရနိုင်မလား

လူတိုင်းကိုမပေးပါဘူး။ ပိုပြီးအကျိုးအမြတ်များလေလေ ရရှိဖို့ ပိုပြီးတော့ အခွင့်အရေးနည်းလေလေပါ။ အထူးသဖြင့် ဘယ်သူမဆို ဘယ်လိုမျိုး အောင်လက်မှတ်လေးရလိုက်တာနဲ့ လူတိုင်းကို နေစားကျောင်းစရိတ် အကုန်လုံးအငြိမ်းမဟုတ်ပါဘူး။​ နာမည်အကြီးဆုံး လျှောက်တဲ့သူအများဆုံး ရရအခက်ဆုံးဆိုတဲ့scholarshipတွေတောင် ကိုယ့်ဘက်ကနေ စိုက်ရတာမျိုးတွေ ရှိထားရတာမျိုးတွေရှိပါတယ်။​ 

ကျောင်းတိုင်းမရနိုင်ပါဘူး

ဒီအကြောင်းအရာလေးက စျေးအပေါဆုံးမှအပေါဆုံးဆိုတဲ့ ကျောင်းနဲ့မြို့တွေသွားကြမယ့်သူတွေနဲ့သက်ဆိုင်ပါတယ်။​ စစချင်းကျောင်းတက်ချိန်မှာတော့ စျေးနည်းပါလိမ့်မယ်။ နောက်ပိုင်းကျမှ မိမိပေးရတဲ့ငွေနဲ့မတန်တဲ့ အလုပ်မဖြစ်တဲ့ ဘွဲ့မျိုးပေးတဲ့ကျောင်းဆိုတာ သိပါလိမ့်မယ်။​ ဥပမာ - Architectureဆိုပြီး ကျောင်းပြီးခါနီး Final yearလိုမျိုးကျမှ Laptopစကိုင်တဲ့ကျောင်းမျိုးနဲ့တွေ့မှာပါ။ ၄နှစ်သင်သင် ၁၀ နှစ်သင်သင် မထူးခြားတဲ့ ကျောင်းတွေလိုမျိုးပေါ့ဗျာ။​

ပိုက်ဆံဘယ်လောက်ရှိမှ လွှတ်သင့်လဲ။ 

လုပ်သင့်တယ်လို့ယူဆတာကတော့ ပြည်တွင်းက ဝင်ငွေရနေတဲ့သူတွေဆိုရင် နိုင်ငံခြားမှာ အခြေချဖို့ စဥ်းစားပါအကောင်အထည်ဖော်ပါ။ ထိုင်းဘတ်တောင် မြန်မာငွေထက် အများကြီးပိုတည်ငြိမ်ပါသေးတယ်။ အဲ့ကနေမှ ဆက်လက်စဥ်းစားလို့ရပါတယ်။ လုပ်ငန်းတွေပြောင်းရွှေ့လုပ်ကိုင်ပါ။ ချဲ့ထွင်ပါ။ 

ပြည်ပမှာ အခြေချပါ။ ပိုက်ဆံကို ရှိရင်းစွဲကုန်ကျမယ်လို့ ယူဆထားတဲ့ ငွေကြေးပမာဏထက်ပိုမိုများပြားတဲ့ပမာဏရှိမှ လွှတ်ပါ။ 

ဥပမာ -

လက်ရှိ ပေါင်(£) 1=8000 MMKလို့ဆိုပါစို့။ ကျောင်းလခ နေစရိတ်စားစရိတ်အပြီးအစီး UKမှာ £30000/yearကုန်မယ်ဆို 240,000,000 MMK သို့မဟုတ် သိန်း ၂၄၀၀/year။ 

ဒီထက် ပိုများတဲ့ပမာဏလောက်ရှိမှသာ ဒီလမ်းရွေးသင့်တယ်လို့ယူဆပါတယ်။ ဘယ်လောက်များသင့်လဲကျနော်မပြောတတ်ပါဘူး။ ခုနေ £1= ၈၀၀၀ကျပ်, နောက်လ မှာ ၁သောင်း ကျပ်ဖြစ်မလား ၂သောင်းဖြစ်မလား ကျနော်မပြောတတ်ပါဘူး။ ဒီတော့ ကိုယ့်ဘက်ကနေများနိုင်သလောက်သာများစေချင်မိပါတယ်။ သိန်း ၂၄၀၀ မို့ သိန်း ၂၄၀၀ ပဲရှိတယ် ဒီထက်မရှာနိုင်တော့ဘူးဆို ပြန်ချင့်ချိန်စေချင်ပါတယ်။ 

မိမိချိန်ထားရမယ့် သေချာပေါက်ပေးရမယ့်အချိန်က ၃နှစ်ဆိုလဲ ဟုတ်တယ်​ ၄ နှစ်ဆိုလဲဟုတ်ပါတယ်။ ဒီလိုပဲ ဒီထက်လဲကြာရင်ကြာသွားနိုင်ပါတယ်။ ဒီအချိန်အတွင်း ကျပ်တန်ဖိုး ဘယ်လောက်ကျဆင်းမလဲ ကျနော်မပြောတတ်ပါဘူး။ ဒီအခြေအနေလေးကိုချင့်ချိန်ထားဖို့ပါ။​

ငွေမရှိဘဲလွှတ်တဲ့အခါ

အခြေအနေအမျိုးမျိုးပါပဲ။ ထိန်းထားလို့ရနိုင်တဲ့အခြေအနေလဲ ဖြစ်ကောင်းဖြစ်နိုင်လိမ့်မယ်။ ထိုနည်းလည်းကောင်း ဒီ ၃/၄လအတွင်း ကျဆင်းသလောက်တော့ ကျဆင်းမှကျဆင်းလိမ့်မယ်။ အဆိုးဆုံးကတော့ တစ်ဝက်တစ်ပျက်နဲ့ ရန်ကုန်ပြန်လာရမှာပါ။ အထူးသဖြင့် ထွက်ပြီးသွားတဲ့အခါမှာ ဘယ်သူမှပြန်လာချင်ကြတာမှမဟုတ်တာ။

နိုင်ငံခြားမသွားသင့်ဘူးလား

ပြောရရင် မြန်မာနိုင်ငံရဲ့လူနေမှုအဆင့်အတန်း၊ လုံခြုံရေး၊ စီးပွားရေး၊​ လူမှုရေး အစစအရာရာကျဆင်းနေချိန် နိုင်ငံခြားဘာကြောင့်သွားသင့်လဲဆိုတာ အကုန်အသိပါ။ ဒီအချိန်မှာ လူတွေရဲ့demandပေါ်မူတည်ပြီး ကျောင်းတွေသင်တန်းတွေ၊ ကျောင်းagent၊ အလုပ်agent စတဲ့နိုင်ငံခြားထွက်ဖို့ ကူညီပေးကြမယ်ဆိုတဲ့သူတွေအများကြီးပေါ်ပေါက်လာတယ်။ ဒီအချိန်မှာ ပြည်ပထွက်ရတာကို 

“ငွေတပြားမှမရှိလဲ ထွက်လို့ရတယ်”

“ပြည်ပအလုပ်အကိုင်ရှာဖွေပေးတယ်”

“နိုင်ငံခြားက ဘယ်ကျောင်းမဆိုတက်လို့ရတယ် scholarshipတွေလဲရတယ်”

စတဲ့ မက်လုံးတွေနဲ့ လူတွေကို လိမ်လည်လှည့်ဖြားနေတာတွေ အများကြီးမြင်ရပါတယ်။​ နိုင်ငံခြားပိုထွက်ချင်ကြလေလေ သူတို့လဲအကျိုးအမြတ်ပိုရလေလေပေါ့။

• တချို့သော စကားလုံးတွေက တကယ်ကိုလိမ်လည်တာပါ။ ပြည်ပကိုထွက်လို့ရမယ်ဆိုပြီး ငွေတွေအတင်းယူ လူတွေကိုစည်းရုံး။ ပြီးကျမှ လိမ်လည်နေတာဖြစ်တယ်။ 
• တချို့ကြတော့ တကယ်နားမလည်ဘဲနဲ့ agentလုပ်တာတွေ အတွေ့အကြုံသိပ်မရှိဘဲနဲ့ကို အကုန်လုံးကို ရတယ်လို့ဆိုပြီး လက်၂လုံးခြားနဲ့ လူတွေကို လှည့်စားနေတာတွေလဲ ထိုနည်းလည်းကောင်းပဲ။​
• လူတွေကိုနိုင်ငံခြားထွက်လို့ရမယ်ဆိုပြီး တကယ်တော့ပို့ပေးပါရဲ့။ ဟိုရောက်တော့မှ ကျောင်းကမကောင်းတာမျိုးဖြစ်စေ၊ အလုပ်ကမကောင်းတာမျိုးဖြစ်စေ မြန်မာနိုင်ငံမှာ ဘာမှမကုန်ကျဘဲနေနေရင်တောင် ပိုကောင်းမယ်ဆိုပြီးပြောရလောက်တဲ့ထိ မကောင်းတာမျိုးတွေပေါံ့ဗျာ။

ဘာလို့ဒီလိုတွေရေးသားနေလဲ

စာဖတ်သူတစ်ဦးပြောသလိုပဲ “…တော်ရုံတန်ရုံလူတွေ ရေးလေ့ပြောလေ့မရှိတဲ့ အကြောင်းအရာတွေ....” ဖြစ်နေတာပေါ့ဗျာ။” ချစ်စရာကောင်းတဲ့ vlogလေးတွေတို့ ဘယ်လောက်ကြီးကို နိုင်ငံခြားရောက်လို့ အဆင်ပြေသွားတာတွေတို့ အထင်ကြီးအောင်တော့ မရေးချင်ဘူးဗျ။​

သူများအားကျရုံကလွဲ ဘယ်သူ့အတွက်မှမှ အကျိုးမှမရှိတာ။ ပိုအကျိုးရှိလောက်မယ့်အရာလေးတွေစဥ်းစားပြီးရွေးတင်ရတာပေါ့ဗျာ။ ပြည်ပထွက်ရတာ မခက်ခဲပါဘူး။ ထိုနည်းလည်းကောင်းမလွယ်ကူပါဘူးဗျ။ ချင့်ချိန်နိုင်ကြပါစေဗျ။

ဒီPostလေးတွေကတော့ဆက်လက်ဖတ်ရှုလို့ကောင်းပါလိမ့်မယ်။