Oxford မှာ ရှင်သန်ခြင်း - သွားလာရေးကို ကျွမ်းကျင်ပိုင်နိုင်ခြင်း

(ဖတ်ရန်ကြာချိန် - ၁၂ မိနစ်)

This article is also available in [English]

Oxford ကိုမရောက်ခင်မှာ သင်စဉ်းစားမိမှာက စာသင်ခန်းတွေ၊ ရှေးဟောင်းအဆောက်အအုံတွေနဲ့ ပန်းခြံတွေအကြောင်းဖြစ်ပါလိမ့်မယ်။ ဒါပေမယ့် ဒီမြို့မှာ တကယ်တမ်းခြေချပြီးတဲ့နောက်၊ သင်နေ့စဉ်ချရမယ့် အရေးကြီးဆုံးဗျူဟာမြောက်ဆုံးဖြတ်ချက်ကတော့ "ဒီနေ့ ငါကျောင်းကို ဘယ်လိုသွားမလဲ" ဆိုတာပါပဲ။

ဒီလမ်းညွှန်က တက္ကသိုလ်ရဲ့ prospectus ထဲမှာ သင်တွေ့ရမှာမဟုတ်တဲ့ လက်တွေ့ဘဝလမ်းညွှန်ပါ။ Oxford ရဲ့ သွားလာရေးစနစ်က London လို မြေအောက်ရထားတွေနဲ့ ရှုပ်ထွေးနေတဲ့ မြို့ကြီးတစ်မြို့နဲ့ လုံးဝမတူပါဘူး။ Oxford ဆိုတာ စက်ဘီးတွေနဲ့ လမ်းလျှောက်သူတွေရဲ့ ကမ္ဘာတစ်ခုပါ။ ဒီမြို့ရဲ့ သွားလာရေးစနစ်တစ်ခုချင်းစီကို ကုန်ကျစရိတ်၊ အားသာချက်၊ အားနည်းချက်တွေနဲ့အတူ ကျနော့်ရဲ့ တစ်နှစ်တာလက်တွေ့အတွေ့အကြုံနဲ့ ယှဉ်ပြီး သုံးသပ်ပြသွားမှာပါ။

နည်းလမ်း (၁) - လမ်းလျှောက်ခြင်း (The Foundation)

သုံးသပ်ချက်: လမ်းလျှောက်ခြင်းက Oxford ကို တကယ် "ခံစား" နိုင်တဲ့ အကောင်းဆုံးနည်းလမ်းပါ။ မြို့ရဲ့ အရှေ့စွန် Wheatley ကနေ အနောက်စွန် Botley အထိ ၃ နာရီလောက်လမ်းလျှောက်ရုံနဲ့ ရောက်နိုင်ပါတယ်။ လူသွားစင်္ကြံတွေက ကောင်းမွန်ပြီး လမ်းမီးတွေက နေရာတိုင်းမှာရှိတဲ့အတွက် ညဘက်သွားလာဖို့ စိတ်ချရပါတယ်။ ကျနော်ကိုယ်တိုင်လည်း ညဥ့်နက်သန်းခေါင်မှာ မြို့စွန်တွေကို လမ်းလျှောက်ဖူးပြီး ဘာပြဿနာမှမရှိခဲ့ပါဘူး။

ကောင်းကျိုး:

• လုံးဝအခမဲ့ဖြစ်ပြီး အချိန်မရွေးသွားလာနိုင်တယ်။
• ကျန်းမာရေးအတွက်ကောင်းသလို မြို့ရဲ့လှပတဲ့လမ်းကြားလေးတွေကို ရှာဖွေတွေ့ရှိနိုင်တယ်။

ဆိုးကျိုး:

• အချိန်အရမ်းပေးရတယ်။ အရေးကြီးကိစ္စရှိတဲ့အခါ အဆင်မပြေနိုင်ဘူး။
• Oxford ရဲ့ အေးစက်ပြီး စိုစွတ်တဲ့ရာသီဥတုက လမ်းလျှောက်ရတာကို ပျော်စရာမကောင်းတဲ့ အတွေ့အကြုံတစ်ခုဖြစ်သွားစေနိုင်တယ်။

နည်းလမ်း (၂) - ကိုယ်ပိုင်စက်ဘီး (The King of Student Transport)

သုံးသပ်ချက်: Bus စောင့်ရတဲ့အချိန်၊ ကားပိတ်တဲ့ဒုက္ခတွေကနေ လွတ်မြောက်ချင်တယ်ဆိုရင် စက်ဘီးက သင့်ရဲ့အကောင်းဆုံးမိတ်ဆွေပါပဲ။ Oxford မှာ စက်ဘီးလမ်းကြောတွေက ကောင်းမွန်ပြီး ကျောင်းသားအများစုက စက်ဘီးကိုပဲ အဓိကအားကိုးကြပါတယ်။

ကျနော့်ရဲ့ လက်တွေ့ကုန်ကျစရိတ် breakdown:

• မရှိမဖြစ်များ:
  • စက်ဘီး (Second-hand ကောင်းကောင်းတစ်စီး): £150
  • D-Lock ကောင်းကောင်းတစ်ခု (မဖြစ်မနေလိုအပ်): £40
  • ရှေ့မီး + နောက်မီး (ဥပဒေအရလိုအပ်): £20
  • စက်ဘီးဦးထုပ် (Helmet): £35
  • စုစုပေါင်း ကနဦးကုန်ကျစရိတ်: ~£245
• အပိုပစ္စည်းများ (Strongly Recommended):
  • Quadlock ဖုန်း Holder + Case: £70 (Google Maps ကြည့်ဖို့ အသက်ပါ)
  • စက်ဘီးလက်အိတ်၊ ခေါင်းစွပ်၊ Ski Mask: ~£50 (ဆောင်းရာသီအတွက်)

ကောင်းကျိုး:

• အချိန်ကုန်သက်သာပြီး ကိုယ်သွားချင်တဲ့အချိန်သွားနိုင်တဲ့ လွတ်လပ်မှု (Flexibility) အပြည့်အဝရှိတယ်။
• Bus ကားခအတွက် ရေရှည်မှာ ငွေအများကြီးသက်သာစေတယ်။

ဆိုးကျိုး:

• စက်ဘီးခိုးခံရခြင်း: Oxford မှာ စက်ဘီးခိုးခံရတာက ဓလေ့တစ်ခုလိုဖြစ်နေပါတယ်။ D-Lock ကောင်းကောင်းမသုံးရင်၊ ဒါမှမဟုတ် ညဘက်အပြင်မှာ အကြာကြီးထားခဲ့ရင် မနက်ကျန်ဖို့မသေချာပါဘူး။ ကျနော့်ရဲ့ ဖြုတ်လို့ရတဲ့မီးလုံးလေးတောင် ခိုးခံလိုက်ရဖူးပါတယ်။
• ပြုပြင်ထိန်းသိမ်းမှု: တစ်လတစ်ခါလောက်တော့ ဘီးပေါက်တာ၊ ချိန်းကျတာမျိုးတွေအတွက် ပြင်ဆင်စရိတ်လေးတွေ ရှိနိုင်ပါတယ်။
• ရာသီဥတုဒဏ်ခံရပါတယ်။ ပင်ပန်းပါတယ်။ ကျောင်း၊ အလုပ်၊ လျှောက်လည်တဲ့အခါ စက်ဘီးသာအသုံးပြုနေမယ့်သူတစ်ဦးအတွက် ကိုက်ညီတဲ့အဝတ်အစား၊ လွယ်အိတ်၊ Bike Accessories မဖြစ်မနေလိုအပ်ပါတယ်။ ဒါတောင် ပစ္စည်းကြီးကြီးမားမားတင်ဖို့ခက်ခဲပါလိမ့်မယ်။

နည်းလမ်း (၃) - ဘတ်စ်ကား (The Reliable Workhorse)

သုံးသပ်ချက်: Oxford ရဲ့ နှစ်ထပ်ဘတ်စ်ကားတွေက မြို့ရဲ့သွေးကြောတွေပါပဲ။ ကျောင်းသားအများစုအတွက် နေ့စဉ်သွားလာရေးရဲ့ အဓိကအစိတ်အပိုင်းတစ်ခုပါ။ "Oxford Bus" app ကို download လုပ်ထားရင် live location ကြည့်ပြီး အချိန်ကိုက်ဆင်းလာလို့ရပါတယ်။

စျေးနှုန်းအသေးစိတ်:

• ကျောင်းသားကတ်ပြနိုင်ရင် တစ်ခေါက်ကို £2ခန့် ပဲကျပါတယ်။
• တစ်ပတ်စာ ကြိုက်သလောက်စီးလို့ရတဲ့ package က £19 ဝန်းကျင်ကျသင့်ပြီး အများကြီးပိုတန်ပါတယ်။

ကောင်းကျိုး:

• ရာသီဥတုဒဏ်ကနေ အကာအကွယ်ပေးပြီး သက်သောင့်သက်သာသွားလာနိုင်တယ်။
• မြို့ရဲ့နေရာအများစုကိုရောက်နိုင်တဲ့ ကျယ်ပြန့်တဲ့ ကွန်ရက်ရှိတယ်။

ဆိုးကျိုး:

• အချိန်မမှန်ခြင်း: App မှာပြထားတဲ့အချိန်နဲ့ တကယ်ရောက်လာတဲ့အချိန်က ၁၀-၁၅ မိနစ်လောက် ကွာခြားတတ်ပါတယ်။ ဒါကြောင့် မှတ်တိုင်ကို အမြဲတမ်း ၅ မိနစ်ကြိုရောက်နေသင့်ပါတယ်။
• လူပြည့်ခြင်း: မနက်ပိုင်း ကျောင်းသွားချိန်တွေမှာ ကားကလူပြည့်သွားရင် သင့်ရှေ့မှာတင် တံခါးပိတ်ပြီးထွက်သွားပါလိမ့်မယ်။ နောက်တစ်စီးကို မိနစ် ၂၀ လောက်ထပ်စောင့်ရနိုင်ပါတယ်။
• အချိန်ဇယားကန့်သတ်ချက်: ည ၁၂ နာရီနောက်ပိုင်းမှာ ကားမရှိတော့ပါဘူး။ ညဥ့်နက်တဲ့အထိ စာကြည့်တိုက်မှာစာလုပ်ချင်တဲ့သူတွေအတွက် အဆင်မပြေပါဘူး။
• နေရာတိုင်းသွားလို့မရဘူး။ လမ်းကြောင်းမသင့်တာမျိုးရှိနိုင်တယ်။

နည်းလမ်း (၄) - E-Scooter (The Modern Wildcard)

သုံးသပ်ချက်: Oxford မှာ တရားဝင်ငှားရမ်းခွင့်ရှိတဲ့ VOI e-scooter တွေက မြန်ပြီး ပျော်စရာကောင်းတဲ့ ရွေးချယ်မှုတစ်ခုပါ။ ဒါပေမယ့် သူ့မှာ ကိုယ်ပိုင်အခက်အခဲတွေရှိပါတယ်။

ကျနော့်ရဲ့ ကိုယ်တွေ့ဇာတ်လမ်း: ကျနော် အရင်က scooter ကို လစဉ်ကြေးနဲ့ငှားစီးခဲ့ဖူးပါတယ်။ တစ်လကို £65 ပေးရတယ်။ ဒါပေမယ့် တစ်လလောက်အကြာမှာ အဆောင်ကနေ "အဆောင်ထဲမှာ အားသွင်းခွင့်မပြုဘူး၊ မီးဘေးအန္တရာယ်စိုးရိမ်ရလို့" ဆိုပြီး တားမြစ်ခဲ့ပါတယ်။ ကိုယ်ပိုင် e-scooter/e-bike တွေအတွက် အားသွင်းဖို့နေရာကလည်း သီးသန့်မရှိတဲ့အတွက် နောက်ဆုံးမှာတော့ ဒီအစီအစဉ်ကို ဖျက်သိမ်းပြီး စက်ဘီးဝယ်လိုက်ရပါတယ်။ ဒါက အဆောင် ဒါမှမဟုတ် အိမ်ရဲ့ စည်းကမ်းချက် (Tenancy Agreement) ကို သေချာဖတ်ဖို့လိုတယ်ဆိုတဲ့ သင်ခန်းစာတစ်ခုပါပဲ။

ကောင်းကျိုး:

• Bus ထက်ပိုမြန်ပြီး ကားလမ်းပိတ်တာကို ရှောင်တိမ်းနိုင်တယ်။
• ကိုယ်ပိုင်အားစိုက်ထုတ်စရာမလိုဘဲ အလွယ်တကူသွားလာနိုင်တယ်။

ဆိုးကျိုး:

• ကုန်ကျစရိတ်များခြင်း: နေ့စဉ်သုံးမယ်ဆိုရင် ကုန်ကျစရိတ်က Bus ထက် အများကြီးပိုများသွားနိုင်ပါတယ်။
• ရရှိနိုင်မှု: ကိုယ်လိုအပ်တဲ့အချိန်မှာ အနီးအနားက stand မှာ scooter မရှိတာမျိုး ဖြစ်တတ်ပါတယ်။
• ဥပဒေလိုအပ်ချက်: UK သင်မောင်းလိုင်စင် (Provisional Driving Licence) မဖြစ်မနေလိုအပ်ပါတယ်။

နည်းလမ်း (၅) နှင့် (၆) - Taxi နှင့် ကိုယ်ပိုင်ကား (The Emergency & The Evolving Need)

• Taxi/Uber: ရန်ကုန်နဲ့ အတူတူပါပဲ။ Uber တို့၊ Royal Cars တို့လို service တွေရှိပါတယ်။ ဒါပေမယ့် စျေးအရမ်းကြီးတဲ့အတွက် ညဘက်အရေးပေါ်အခြေအနေ ဒါမှမဟုတ် ပစ္စည်းအများကြီးသယ်ရတဲ့အချိန်ကလွဲရင် ကျောင်းသားတစ်ယောက်အတွက် နေ့စဉ်သုံးဖို့ မဖြစ်နိုင်ပါဘူး။
• ကိုယ်ပိုင်ကား: ဒီနေရာမှာ အမြင်နှစ်မျိုးခွဲပြီး ပြောဖို့လိုပါတယ်။
  • ကျောင်းသားဘဝ၊ Oxford မြို့တွင်းအတွက်: ကားတစ်စီးက ဘဏ္ဍာရေးထောင်ချောက် (Financial Trap) တစ်ခုပါပဲ။ ကားဝယ်ဖို့၊ လိုင်စင်ဖြေဖို့၊ insurance နဲ့ parking အတွက် ကုန်ကျစရိတ်တွေက အလွန်များပြားပြီး မြို့ထဲမှာ ကားမောင်းရတာကလည်း အင်မတန်ခက်ခဲပါတယ်။ ကျောင်းသားတစ်ယောက်အနေနဲ့ Oxford မြို့ထဲမှာပဲ အဓိကနေထိုင်သွားလာမယ်ဆိုရင် ကားက လုံးဝမလိုအပ်တဲ့ ဝန်ထုပ်ဝန်ပိုးတစ်ခုပါ။
  • ဘဝအဆင့်ပြောင်းလဲလာချိန်၊ မြို့ပြင်ခရီးအတွက်: ဒါပေမယ့် သင်က ကျောင်းပြီးလို့ အလုပ်လုပ်တဲ့အဆင့်ရောက်လာတဲ့အခါ၊ ဒါမှမဟုတ် တခြားမြို့တွေကို မကြာခဏခရီးသွားဖို့ လိုအပ်လာတဲ့အခါမှာတော့ ကားတစ်စီးရဲ့တန်ဖိုးက သိသိသာသာတက်လာပါတယ်။ အထူးသဖြင့် public transport နဲ့ရောက်ဖို့ခက်ခဲတဲ့ ကျေးလက်ဒေသတွေကို သွားချင်တဲ့အခါ၊ ဒါမှမဟုတ် အလုပ်အတွက် ပစ္စည်းအများကြီးသယ်ရတဲ့အခါ၊ အလုပ်လုပ်နိုင်တဲ့နေရာအကျယ်အဝန်းကို စက်ဘီးနဲ့ရောက်နိုင်တဲ့နေရာတင်မဟုတ် ချဲ့ထွင်ချင်လာတဲ့အခါ မှာ ကားက မရှိမဖြစ်လိုအပ်တဲ့အရာတစ်ခု ဖြစ်လာပါတယ်။ ဒါကြောင့် ကားဆိုတာက "မကောင်းဘူး" လို့ တထစ်ချပြောလို့မရဘဲ၊ "ဘယ်အချိန်၊ ဘယ်နေရာမှာ" သုံးမလဲဆိုတဲ့အပေါ်မှာ မူတည်နေပါတယ်။

နည်းလမ်း (၇) - မြို့အချင်းချင်း ခရီးသွားခြင်း (Inter-City Travel)

Oxford မှာနေထိုင်ခြင်းရဲ့ အားသာချက်တစ်ခုက တခြားမြို့ကြီးတွေကို အလွယ်တကူသွားရောက်နိုင်တာပါပဲ။

• Oxford Tube (လန်ဒန်သို့ အလွယ်ကူဆုံးခရီး): ဒါက Oxford နဲ့ London ကြားမှာ 24/7 ပြေးဆွဲပေးနေတဲ့ အမြန်ဘတ်စ်ကားလိုင်းတစ်ခုပါ။ ကားတွေက သက်သောင့်သက်သာရှိပြီး Wi-Fi ပါဝင်ပါတယ်။ Oxford မြို့လယ်Gloucester Green Bus Station ကနေထွက်ပြီး Londonမြို့လယ်ရဲ့ Victoria Coach Station ကို တိုက်ရိုက်ရောက်ပါတယ်။
  • ကုန်ကျစရိတ်: အသွားအပြန်လက်မှတ်က £20 လောက်ပဲကျပြီး အလွန်တန်ပါတယ်။
  • ကြာချိန်: ယာဉ်ကြောအခြေအနေပေါ်မူတည်ပြီး ၁ နာရီခွဲကနေ ၂ နာရီခွဲလောက် ကြာတတ်ပါတယ်။
• ရထား (Train - UK တစ်ခွင်သို့): Oxford Railway Station ကနေ UK ရဲ့ မြို့ကြီးအများစုကို တိုက်ရိုက် ဒါမှမဟုတ် တစ်ဆင့်ပြောင်းပြီး သွားနိုင်ပါတယ်။ London, Birmingham, Manchester တို့ကို အလွယ်တကူရောက်နိုင်ပါတယ်။
  • ကုန်ကျစရိတ်: ရထားလက်မှတ်က စျေးကြီးတတ်ပါတယ်။ ဒါကြောင့် "16-25 Railcard" ကို £30 နဲ့ တစ်နှစ်စာဝယ်ထားသင့်ပါတယ်။ ဒါက သင့်ရဲ့ ရထားလက်မှတ်ခအားလုံးကို 33% လျှော့စျေးပေးမှာဖြစ်လို့ ခရီးနှစ်ခေါက်လောက်သွားလိုက်တာနဲ့တင် အရင်းကျေပါတယ်။
  • အကြံပြုချက်: သွားမယ့်နေရာပေါ်မူတည်ပြီးစျေးချိုတဲ့optionလေးတွေရှိတတ်ပါတယ်။ Railway station မှာဝယ်ယူဖို့အကြံပြုလိုပါတယ်။

ဒီနေရာမှာ ကားက ဘယ်လိုပြန်အရေးပါလာသလဲ။ သင်က London လိုမျိုး public transport အရမ်းကောင်းတဲ့မြို့ကိုသွားမယ်ဆိုရင်တော့ ကားမလိုအပ်ပါဘူး။ ဒါပေမယ့် Cotswolds လိုမျိုး လှပတဲ့ကျေးလက်ဒေသတွေကို explore လုပ်ချင်တဲ့အခါ၊ ဒါမှမဟုတ် ရထားလမ်းမပေါက်တဲ့ မြို့ငယ်လေးတွေကို သွားချင်တဲ့အခါ ကျနော့်လိုမျိုး ရိုက်ကူးရေးပစ္စည်းပေါင်းများစွာ သယ်ယူရတဲ့အခါမှာတော့ ကိုယ်ပိုင်ကားရှိခြင်းက သင့်ကို တကယ့်လွတ်လပ်မှုကို ပေးစွမ်းနိုင်မှာဖြစ်ပါတယ်။

ကျနော့်ရဲ့ အပြီးသတ်ရွေးချယ်မှု (My Ultimate Choice for Oxford)

သံသယဖြစ်စရာမရှိပါဘူး၊ Oxford မြို့တွင်း နေ့စဉ်သွားလာရေးအတွက်တော့ ကျနော့်အတွက် စက်ဘီး က အကောင်းဆုံးပါပဲ။ ကနဦးရင်းနှီးမြှုပ်နှံမှုနဲ့ ပြုပြင်ထိန်းသိမ်းမှုတွေရှိပေမယ့်၊ သူပေးနိုင်တဲ့ လွတ်လပ်မှု၊ အချိန်မှန်မှုနဲ့ ရေရှည်မှာငွေကုန်သက်သာမှုတွေကို တခြားဘာနဲ့မှ လဲလို့မရပါဘူး။ မိုးရွာရွာ နေပူပူ၊ ကိုယ်သွားချင်တဲ့အချိန်မှာ ဘယ်သူ့ကိုမှစောင့်စရာမလိုဘဲ ထွက်သွားနိုင်ခြင်းက ကျောင်းသားဘဝရဲ့ အဖိုးတန်ဆုံးသော လွတ်လပ်မှုတစ်ခုပါ။

သို့သော် နည်းလမ်းပေါင်းစုံက အခြေအနေပေါင်းစုံမှာအသုံးဝင်တာမို့ နည်းလမ်းအားလုံးကို အကောင်းဆုံးအသုံးပြုတတ်ရမှာပါ။

နိဂုံးချုပ်အနေနဲ့၊ သင်ရွေးချယ်တဲ့ သွားလာရေးနည်းလမ်းက သင် Oxford ကို ဘယ်လိုပုံစံနဲ့ တွေ့ကြုံခံစားမလဲဆိုတာကို ဆုံးဖြတ်ပေးပါလိမ့်မယ်။ ဒါက နေရာတစ်ခုကနေတစ်ခုကို ရောက်ဖို့သက်သက်မဟုတ်ဘဲ၊ သင်ရဲ့ အဖိုးတန်ဆုံးအရင်းအမြစ်တွေဖြစ်တဲ့ အချိန် နဲ့ ငွေ ကို သင်ဘယ်လိုစီမံခန့်ခွဲမလဲဆိုတဲ့ နေ့စဉ်ဗျူဟာတစ်ခုလည်း ဖြစ်ပါတယ်။၏