မြန်မာ့ဒီဂျစ်တယ်စစ်မြေပြင်- ထိန်းချုပ်မှု၊ ခုခံတော်လှန်မှု နှင့် တိုးတက်ပြောင်းလဲလာမှုများ

"၂၀၂၁ ခုနှစ် အာဏာသိမ်းပြီးနောက် ပထမတစ်ပတ်အတွင်း မြန်မာစစ်တပ်သည် ဒစ်ဂျစ်တယ်ယဉ်ကျေးမှုဖြတ်ကျော်ပေါင်းစပ်ခြင်းကို မည်သို့အနှောင့်အယှက်ပေးရန် ကြိုးပမ်းခဲ့သနည်း၊ ထိုလုပ်ရပ်ကို တုံ့ပြန်ရာတွင် မြန်မာပြည်သူများအကြား အစောပိုင်း ဒစ်ဂျစ်တယ်ခုခံတော်လှန်မှုပုံစံများ နှင့် အခြေအနေနှင့်အညီ လိုက်လျောညီထွေစွာ ပြုပြင်ပြောင်းလဲမှုများ မည်သို့ ပေါ်ပေါက်လာခဲ့သနည်း။"

နိဒါန်း- ခေတ်ဟောင်းစစ်ပွဲ၏ ခေတ်သစ်တိုက်မျက်နှာ

အမှုဆောင်အကျဉ်းချုပ်

အရှေ့တောင်အာရှရှိ ဖွံ့ဖြိုးဆဲနိုင်ငံတစ်ခုဖြစ်သော မြန်မာနိုင်ငံသည် လွန်ခဲ့သောဆယ်စုနှစ်အတွင်း ဒီမိုကရေစီနိုင်ငံအဖြစ်သို့ တဖြည်းဖြည်းကူးပြောင်းနေခဲ့သည်။ ၂၀၂၁ ခုနှစ် ဖေဖော်ဝါရီလတွင် စစ်တပ်အာဏာသိမ်းမှုကြောင့် နိုင်ငံရေးနှင့် လူမှုရေးပဋိပက္ခများ ပြင်းထန်စွာ ဖြစ်ပွားခဲ့သည်။ ယခုတစ်ကြိမ်တွင် ဒစ်ဂျစ်တယ်ကဏ္ဍသည် အရေးပါသော 'ပဋိပက္ခဖြစ်ပွားရာနေရာ' အဖြစ် ပေါ်ထွက်လာခဲ့သည်။ "..A battleground between the military junta’s power-consolidating efforts and the people’s resistance movements."ပင်။

မြန်မာစစ်တပ်မှ ဒစ်ဂျစ်တယ်အာဏာရှင်ပီသစွာ အင်တာနက်ဖြတ်တောက်ခြင်း၊ လူမှုကွန်ရက်ပိတ်ပင်ခြင်းနှင့်စောင့်ကြည့်ခြင်းပြုလုပ်ခဲ့သည်။ ပြည်သူလူထုဘက်မှ VPN နှင့် လုံခြုံသောစာတိုပေးပို့ဆက်သွယ်ရေးစနစ်များ စတဲ့ ဒစ်ဂျစ်တယ်ခုခံတော်လှန်မှု နည်းဗျူဟာများဖြင့် တုန့်ပြန်ခဲ့သည်။ "စစ်အာဏာရှင်၏ လျှင်မြန်စွာဒစ်ဂျစ်တယ်ထိန်းချုပ်ခြင်း" နှင့် "ပြည်သူလူထု၏ကျယ်ပြန့်သည့် ဒစ်ဂျစ်တယ်ခုခံတော်လှန်မှု" တို့ကြား ဆိုက်ဘာစပေ့စ် (cyberspace) သည် အဓိကစစ်မြေပြင်ဖြစ်ကြောင်း မီးမောင်းထိုးပြနေသည်

ဤအစီရင်ခံစာသည် မြန်မာလူငယ်များအတွက် ဤအရေးပါသော သမိုင်းဝင်အခိုက်အတန့်ကို နားလည်စေရန်နှင့် အလားတူ ဒစ်ဂျစ်တယ်ထိန်းချုပ်မှုပုံစံများကို ဆန့်ကျင်သည့် နည်းဗျူဟာများအတွက် အသိပညာပေးရန် ရည်ရွယ်သည်။ ဤဒီဂျစ်တယ်စစ်ပွဲကို နားလည်ခြင်းသည် အဘယ်ကြောင့် ကျွန်ုပ်တို့အားလုံးအတွက် အရေးကြီးသည်ကို ရှင်းပြသွားမည် ဖြစ်သည်။ ပြည်တွင်းမီဒီယာများ၊ နိုင်ငံတကာမီဒီယာများ၊ သုတေသနအဖွဲ့အစည်းများနှင့် လူ့အခွင့်အရေးအဖွဲ့များထံမှရေးသားချက်များကို ကိုးကားထားသည်။

I. နိဒါန်းအကျဉ်း

ဒေါ်အောင်ဆန်းစုကြည်ဦးဆောင်သော ဒီမိုကရေစီလိုလားသည့် "အမျိုးသားဒီမိုကရေစီအဖွဲ့ချုပ်" ပါတီသည် ၂၀၁၅ ခုနှစ် ရွေးကောက်ပွဲတွင် အပြတ်အသတ်အနိုင်ရရှိခဲ့ပြီးနောက် ၁၉၆၂ ခုနှစ် နေဝင်းအာဏာသိမ်းပြီးချိန်မှစ၍ ပထမဆုံး စစ်ဘက်မဟုတ်သော သမ္မတတစ်ဦးအတွက် လမ်းခင်းပေးနိုင်ခဲ့သည်။ ထိုအချိန်မှစ၍ မြန်မာနိုင်ငံသည် နည်းပညာပိုင်းဆိုင်ရာ တိုးတက်မှုများကို လျင်မြန်စွာ ကြုံတွေ့ခဲ့ရပြီး အင်တာနက်အသုံးပြုမှုနှင့် မိုဘိုင်းဆက်သွယ်ရေးကဏ္ဍတို့ သိသိသာသာ တိုးတက်လာခဲ့သည်။ အခုစာရေးသူတို့ ရေးသားဖတ်ရှုစဥ် အသုံးပြုနေတဲ့ မြန်မာUnicode Fontသည်ပင် အသီးအပွင့်တစ်ခု။၊

လူမှုကွန်ရက်သည် ချစ်ခင်ရသူများနှင့် ဗီဒီယိုခေါ်ဆိုခြင်း၊ ခရိုနီများကို ဆန္ဒပြခြင်းမှသည် Facebook Live တွင် အွန်လိုင်းမှ ပစ္စည်းရောင်းချခြင်းအထိ ပြည်သူအများစု၏ လူမှုရေး၊ စီးပွားရေးနှင့် နိုင်ငံရေးဘဝများတွင် နက်ရှိုင်းစွာ ပေါင်းစပ်ပါဝင်လာခဲ့သည်။ ဤကဲ့သို့ ကမ္ဘာလုံးဆိုင်ရာနှင့် ပြည်တွင်းယဉ်ကျေးမှု လွှမ်းမိုးမှုများအကြား လှုပ်ရှားတက်ကြွသော ဖလှယ်မှုသည် စစ်အာဏာရှင်အဖွဲ့အတွက် ခြိမ်းခြောက်မှုတစ်ရပ်ဖြစ်လာခဲ့သည်။

အာဏာသိမ်းပြီးနောက် ချက်ချင်းဆိုသလိုပင် စစ်အာဏာရှင်အဖွဲ့သည် တိုးပွားလာသော ဩဇာလွှမ်းမိုးမှုရှိသည့် ဤနေရာကို ထိန်းချုပ်ရန် ဦးစားပေးဆောင်ရွက်ခဲ့သည်။ ၎င်းတို့၏ နည်းဗျူဟာမှာ ဘက်ပေါင်းစုံမှဖြစ်ပြီး

• တစ်နိုင်ငံလုံးတွင် အင်တာနက်သုံးစွဲခွင့်ကို တမင်တကာ ဖြတ်တောက်ခြင်း၊
• အွန်လိုင်းအခြေပြုလုပ်ငန်းများမီခိုရာ လူကြိုက်များသည့် လူမှုကွန်ရက်များကိုပိတ်ပင်ခြင်း၊
• စစ်အုပ်ချုပ်ရေးယန္တရားကို ခြိမ်းခြောက်နေသူများ၏ အွန်လိုင်းလှုပ်ရှားမှုများကို စောင့်ကြည့်ဖို့နည်းလမ်းများ အကောင်အထည်ဖော်ခြင်းတို့ ပါဝင်သည်။

အပိုင်း ၁- မုန်တိုင်းမတိုင်မီ ဒီဂျစ်တယ်ခေတ်၏ ရွှေရောင်နေ့ရက်များ (အာဏာမသိမ်းမီ မြန်မာနိုင်ငံ)

ဤအပိုင်းသည် စစ်အာဏာသိမ်းမှုကြောင့် ဆုံးရှုံးခဲ့ရသော "သာမန်အခြေအနေ" ကို ပုံဖော်ထားသည်။ စစ်အာဏာရှင်တို့၏ ဒီဂျစ်တယ်နည်းပညာဆိုင်ရာ ဖြိုခွင်းမှုများက အဘယ်ကြောင့် ဤမျှ ပြင်းထန်သော ထိုးနှက်ချက်ဖြစ်ခဲ့သည်ကို နားလည်နိုင်ရန်၊ အရှိန်အဟုန်ဖြင့် ဒီဂျစ်တယ်ကမ္ဘာသို့ ချိတ်ဆက်နေသော လူ့အဖွဲ့အစည်းတစ်ခု၏ ပုံရိပ်ကို အသေးစိတ် တင်ပြသွားမည်ဖြစ်သည်။

၁.၁ အွန်လိုင်းပေါ်သို့ ရောက်ရှိလာသော နိုင်ငံတစ်နိုင်ငံ- ကြီးကျယ်သော ခုန်ပျံကျော်လွှားမှု

၂၀၁၃ ခုနှစ်တွင် ဆက်သွယ်ရေးကဏ္ဍကို လွတ်လပ်စွာလုပ်ကိုင်ခွင့်ပြုလိုက်ခြင်းသည် မြန်မာနိုင်ငံ၏ ဒီဂျစ်တယ်သမိုင်းတွင် အကြီးမားဆုံးသော အပြောင်းအလဲတစ်ခု ဖြစ်ခဲ့သည်။ နိုင်ငံတော်၏ တစ်ဦးတည်းချုပ်ကိုင်မှုကို ဖြိုခွဲကာ Telenor နှင့် Ooredoo ကဲ့သို့သော နိုင်ငံတကာကုမ္ပဏီများကို ဈေးကွက်အတွင်းသို့ ဝင်ရောက်ခွင့်ပြုခဲ့ရာ ဒီဂျစ်တယ်ကမ္ဘာသို့ တံခါးဖွင့်ပေးလိုက်သကဲ့သို့ ဖြစ်ခဲ့သည်။  

ဤအပြောင်းအလဲ၏ ရလဒ်မှာ အံ့မခန်းဖွယ်ရာပင်။ Data Reportal မှပြုစုထားသောစာရင်းများအရ ၂၀၂၀ ခုနှစ် ဇန်နဝါရီလတွင် အင်တာနက်အသုံးပြုသူ ၂၂ သန်း (လူဦးရေ၏ ၄၁%) ရှိခဲ့ရာမှ၊ ၂၀၂၁ ခုနှစ် ဇန်နဝါရီလအရောက်တွင် ၂၃.၆၅ သန်း (လူဦးရေ၏ ၄၃.၃%) အထိ တိုးတက်လာခဲ့သည်။ ထို့ထက်ပို၍ အထင်ကြီးစရာကောင်းသည်မှာ မိုဘိုင်းဖုန်းချိတ်ဆက်မှု အရေအတွက်ဖြစ်ပြီး၊ နိုင်ငံလူဦးရေ၏ ၁၂၇.၂% အထိ ရှိနေခဲ့သည်။

နားလည်လွယ်အောင်ရှင်းပြရရင် လူတစ်ဦးသည် ဖုန်းတစ်လုံးထက်ပို၍ ကိုင်ဆောင်ကြသည် ဒါကိုညွှန်ပြနေသည်။ အမှန်ပင် သာမန်ပြည်သူများ၏ ဘဝတွင် ကြီးမားသော အပြောင်းအလဲများကို ဆောင်ကြဉ်းပေးခဲ့သည်။ နိုင်ငံရပ်ခြားမှ မိသားစုဝင်များကို ပထမဆုံးအကြိမ်အဖြစ် ဗီဒီယိုခေါ်ဆို၍ မြင်တွေ့နိုင်ခဲ့ကြသည်၊ အသေးစားစီးပွားရေးလုပ်ငန်းရှင်များသည် ဖောက်သည်အသစ်များကို အွန်လိုင်းမှ ရှာဖွေနိုင်ခဲ့ကြပြီး၊ လူငယ်များသည် နိုင်ငံတော်မှ ထိန်းချုပ်ထားသော မီဒီယာများ၏ အပြင်ဘက်ရှိ ကမ္ဘာကြီး၏ အသိပညာဗဟုသုတများကို ရယူနိုင်ခဲ့ကြသည်။

မဲပေါက်မှ လူကြီးနဲ့သိမှ ဝန်ထမ်းဖြစ်မှ သိန်းဆယ်ချီပေးမှ ရရှိနိုင်သော ဆင်းကဒ်တွေသည်လဲ တစ်ကဒ် ၁၅၀၀ မျှတန်ကြေးရှိတော့ပြီး ဖုန်းဘေကုန်ကျစရိတ်မှာလဲ အဆနဲ့ချီနည်းပါးလာခဲ့သည်။

သို့သော်လည်း ဤတိုးတက်မှုသည် တစ်နိုင်ငံလုံးကို အညီအမျှ လွှမ်းခြုံနိုင်ခဲ့ခြင်း မရှိပါ။ ကျေးလက်ဒေသများရှိ လူဦးရေ၏ ၆၈.၇% မှာ အင်တာနက်ကို ကောင်းစွာအသုံးမပြုနိုင်သေးဘဲ ဒေသအလိုက် ကွာဟမှုများ ရှိနေခဲ့သည်။ ဒစ်ဂျစ်တယ်နည်းပညာ (Digital Literacy)နည်းပါးမှု သို့မဟုတ် ဤ "ဒီဂျစ်တယ်ကွာဟမှု" သည် နောင်တစ်ချိန်တွင် စစ်အာဏာရှင်တို့ အသုံးချမည့် အားနည်းချက်တစ်ခု ဖြစ်လာခဲ့သည်။  

၁.၂ Facebook သည် အင်တာနက်ဖြစ်လာခဲ့သောအခါ

မြန်မာပြည်သူအများစုအတွက် Facebook သည် အင်တာနက်နှင့် ဝေါဟာရခြင်းဖလှယ်၍ သုံးစွဲလို့ရနီးပါး ဖြစ်ခဲ့သည်။ Data Reportal ၏စာရင်းများအရ ၂၀၂၁ ခုနှစ်တွင် Facebook သည် လူမှုကွန်ရက်အသုံးပြုမှု၏ ၈၉.၇% ကို ချုပ်ကိုင်ထားခဲ့သည်၊ Messenger သည် ၄၇.၀%၊ YouTube သည် ၄၁.၉%။ Facebookသည် လူမှုရေးအရ မိတ်ဆွေဖွဲ့ရာ၊ နိုင်ငံရေးအကြောင်း ဆွေးနွေးငြင်းခုံရာ၊ သတင်းအမှန်အမှားများ ရယူရာ နေရာတစ်ခုအဖြစ်သာမက အွန်လိုင်းမှ "Live Sale" များဖြင့် ရောင်းဝယ်ဖောက်ကားကြသည့် ကြီးမားသော ဈေးကွက်ကြီးတစ်ခုလည်း ဖြစ်ခဲ့သည်။

သို့သော် ဤသို့ Facebook အပေါ် လုံးလုံးလျားလျား မှီခိုနေရခြင်း၏ နောက်ကွယ်တွင် အန္တရာယ်များ ကိန်းအောင်းနေခဲ့သည်။ ရိုဟင်ဂျာလူနည်းစုအပေါ် အကြမ်းဖက်မှုများနှင့် ပတ်သက်၍ အမုန်းစကားများ ဖြန့်ဝေရာတွင် Facebook ကို အသုံးပြုခဲ့ကြဖူးသည်။ လူအများကြားအစိတ်စိတ်အမွှာမွှာ ကွဲပြားစေနိုင်သည့် စွမ်းအားလည်း ရှိကြောင်း သက်သေပြခဲ့သည်။ ဤအခြေအနေသည် အာဏာမသိမ်းမီကတည်းက တည်ရှိနေခဲ့သော အားနည်းချက်တစ်ခုဖြစ်ပြီး ဒီဂျစ်တယ်လွတ်လပ်ခွင့်၏ အန္တရာယ်ရှိသော မျက်နှာစာတစ်ခုကို ဖော်ပြနေသည်။  

၁.၃ ဒီဂျစ်တယ်စီးပွားရေး၏ အရုဏ်ဦး

အင်တာနက်နှင့်အတူ အီလက်ထရွန်နစ်စီးပွားရေး (e-commerce) သည်လည်း အရှိန်အဟုန်ဖြင့် ကြီးထွားလာခဲ့သည်။ Shop.com.mm ကဲ့သို့သော အွန်လိုင်းဈေးဝယ်ပလက်ဖောင်းများ၊ KBZPay နှင့် Wave Money ကဲ့သို့သော မိုဘိုင်းငွေပေးချေမှုစနစ်များသည် နေ့စဉ်ဘဝ၏ အရေးပါသော အစိတ်အပိုင်းများ ဖြစ်လာခဲ့သည်။

ငွေလွှဲပြောင်းခြင်း၊ အွန်လိုင်းမှ ဈေးဝယ်ခြင်းတို့ကို လွယ်ကူစေခဲ့ပြီး ဒီဂျစ်တယ်စီးပွားရေးလုပ်ငန်းရှင် မျိုးဆက်သစ်တစ်ရပ်ကို မွေးဖွားပေးခဲ့သည်။ သို့သော် စည်းစနစ်တကျဖွံ့ဖြိုးတိုးတက်လာခြင်းမဟုတ်တဲ့ သက်တမ်းနုနယ်သေးသည့် ဒီဂျစ်တယ်စနစ်အပေါ် အလုံးစုံမှီခိုလာခြင်းက နောင်တွင် စစ်အာဏာရှင်တို့၏ ထိန်းချုပ်မှုအောက်သို့ ပြည်သူများကို အလွယ်တကူ သက်ဆင်းစေမည့် အန္တရာယ်တစ်ခု ဖြစ်ခဲ့သည်။

၁.၄ 'ယဉ်ကျေးမှုစပ်ယှက်ခြင်း' ခေတ်သစ်နှင့် စစ်တပ်၏ စိုးရိမ်မှု

အင်တာနက်မှတစ်ဆင့် ကမ္ဘာတစ်ဝှမ်းမှ ယဉ်ကျေးမှုများ၊ အတွေးအခေါ်များနှင့် သတင်းအချက်အလက်များကို လွယ်ကူစွာ ရရှိလာသောအခါ မြန်မာ့လူ့အဖွဲ့အစည်းတွင် "ယဉ်ကျေးမှုစပ်ယှက်ခြင်း" (Cultural Hybridity) ဟု ခေါ်ဆိုနိုင်သော အခြေအနေတစ်ရပ် ပေါ်ပေါက်လာခဲ့သည်။ YouTube နှင့် Facebook ကဲ့သို့သော ပလက်ဖောင်းများမှတစ်ဆင့် နိုင်ငံတကာရေစီးကြောင်းများနှင့် ပြည်တွင်းမြန်မာ့ဟန်ပန်များကို အားကစား၊ အနုပညာ၊ စီးပွားရေး စတဲ့ကဏ္ဍအရပ်ရပ်မှာ ပေါင်းစပ်လာနိုင်ခဲ့ကြသည်။

သို့သော် သို့သော်......

လွတ်လပ်ပွင့်လင်းပြီး ကမ္ဘာနှင့်ချိတ်ဆက်နေသော ဒီဂျစ်တယ်ဝန်းကျင်သည် အာဏာသိမ်းစစ်တပ်၏ 'အထက်မှအောက်သို့စီမံခန့်ခွဲသည့် အမျိုးသားရေးဝါဒအတွေးအခေါ်' အတွက် တိုက်ရိုက်ခြိမ်းခြောက်မှုတစ်ခုအဖြစ် ရှုမြင်ခံခဲ့ရသည်။ စစ်အာဏာရှင်တို့သည် ဒီဂျစ်တယ်လွတ်လပ်ခွင့်ကို တိုးတက်မှုအဖြစ် မမြင်ဘဲ ၎င်းတို့ ပြန်လည်သိမ်းပိုက်ရမည့် ထိန်းချုပ်မှု ဆုံးရှုံးခြင်းတစ်ခုအဖြစ်သာ သတ်မှတ်ခဲ့သည်။

အာဏာမသိမ်းမီ ဒီဂျစ်တယ်ခေတ်၏ တိုးတက်မှုများသည် ပြည်သူများကို စွမ်းအားမြှင့်တင်ပေးခဲ့သော်လည်း၊ တစ်ချိန်တည်းမှာပင် အလွန်ဗဟိုချုပ်ကိုင်ပြီး ကြံ့ခိုင်မှုမရှိသော စနစ်တစ်ခုကို ဖန်တီးခဲ့သလိုပင်။

Facebook ကဲ့သို့ ပလက်ဖောင်းတစ်ခုတည်းနှင့် Telenor, Ooredoo ကဲ့သို့သော နိုင်ငံခြားကုမ္ပဏီအနည်းငယ်အပေါ် အလွန်အမင်း မှီခိုနေခြင်းသည် စစ်တပ်အတွက် အလွယ်တကူ ပစ်မှတ်ထားတိုက်ခိုက်နိုင်သည့် အားနည်းချက်များ ဖြစ်ခဲ့သည်။ ဒီမိုကရေစီအသွင်ကူးပြောင်းရေးကာလတွင်ပင် စစ်တပ်သည် ဤဖွဲ့စည်းပုံကို သတိပြုမိခဲ့ဖွယ်ရှိသည်။ ကွန်ပျူတာတိုင်းကို လိုက်လံထိန်းချုပ်ရန် မလိုအပ်ဘဲ ပြည်သူလူထုထံမရောက်ခင် ဆက်သွယ်ရေးCompanyအဆင့်မှာတင် ထိန်းချုပ်ရန်လိုအပ်သည်ကို နားလည်ခဲ့ကြသည်။

အမှန်တော့ "ရွှေရောင်နေ့ရက်များ" ဟု တင်စားခဲ့သော ထိုကာလသည် အာဏာရှင်တို့၏ ဖိအားဒဏ်ကို မလွန်ဆန်နိုင်သော အခြေခံအုတ်မြစ်ပေါ်တွင် တည်ဆောက်ထားခဲ့ခြင်း ဖြစ်သည်။ 'ရွှေရည်စိမ်လွတ်လပ်ရေး' ပင်။ Telenor ကုမ္ပဏီသည် နောက်ပိုင်းတွင် စောင့်ကြည့်ရေးနည်းပညာများ တပ်ဆင်ရန်နှင့် သုံးစွဲသူအချက်အလက်များကို မျှဝေရန် အတင်းအကျပ် ဖိအားပေးခံရသည့်အခါ မလွန်ဆန်နိုင်ခဲ့ပေ။

Telenor သည် ၂၀၂၁ ခုနှစ် ဖေဖော်ဝါရီလ စစ်အာဏာသိမ်းပြီး ငါးလအကြာ ၂၀၂၁ ခုနှစ် ဇူလိုင်လတွင် M1 Group နှင့် ရောင်းချရေးသဘောတူညီချက်ကို ချုပ်ဆိုခဲ့သည်။ သို့သော်လည်း စစ်ကောင်စီက ပြည်တွင်းမိတ်ဖက်တစ်ဦး ပါဝင်ရန် တောင်းဆိုကာ ရောင်းချမှုကို ပိတ်ပင်ခဲ့သည်။ ထို့ကြောင့် Telenor Myanmar ကို စစ်ကောင်စီနှင့် နီးစပ်သည့် Shwe Byain Phyu အုပ်စုက လွှဲပြောင်းရယူခဲ့ပြီး M1 Group မှာ အစုရှယ်ယာအနည်းစုပိုင်ရှင်အဖြစ် ဆက်လက်တည်ရှိခဲ့သည်။ အဆုံးသတ်တွင် Company ၏မူလတန်ဖိုးရဲ့ ၅ဆမက လျှော့ချပြီး ရောင်းချခဲ့ရသည်။

ဒီဂျစ်တယ်လွတ်လပ်ခွင့်ကို ဖြစ်ပေါ်စေခဲ့သော အခြေခံအဆောက်အအုံသည်ပင်လျှင် ဒီဂျစ်တယ်ဖိနှိပ်မှုအတွက် အကောင်းဆုံးသော လက်နက်ဖြစ်လာနိုင်ကြောင်း ထင်ရှားစွာ မြင်တွေ့ခဲ့ရသည်။  

အပိုင်း ၂- အမှောင်ကျသော ပထမ ၇ ရက် (၂၀၂၁ ခုနှစ်၊ ဖေဖော်ဝါရီ ၁-၇)

ဤအပိုင်းသည် အာဏာသိမ်းပြီး ပထမဆုံး ၇ ရက်အတွင်း ဖြစ်ပျက်ခဲ့သော အဖြစ်အပျက်များကို နေ့စွဲအလိုက် တင်ပြထားသည်။ စစ်အာဏာရှင်တို့၏ ဒီဂျစ်တယ်တိုက်ခိုက်မှုများ၏ အရှိန်နှင့် မဟာဗျူဟာ၊ နှင့် ပြည်သူလူထု၏ ချက်ချင်းလက်ငင်း တုံ့ပြန်ခုခံမှုများကို အသေးစိတ် ဖော်ပြသွားမည် ဖြစ်သည်။

မနက်ဖန်တွင် ဒုတိယအပိုင်း ဆက်လက်ဝေမျှသွားပါမည်။

ဤဆောင်းပါးသည် ကျွန်တော်၏ တက္ကသိုလ်ဒုတိယနှစ် သုတေသနစာတမ်းတစ်ခုကို အခြေခံပြီး ပြည်သူလူထုပိုမိုနားလည်လွယ်အောင် ပြန်လည်မွမ်းမံဖြည့်စွက်ရေးသားထားခြင်း ဖြစ်ပါတယ်။ ဆောင်းပါးသုံးပိုင်းစလုံး ဖော်ပြပြီးစီးသွားသည့်အခါ၊ ပညာရပ်ဆိုင်ရာ ရင်းမြစ်များကို အပြည့်အစုံကိုးကားထားသည့် မူရင်းအင်္ဂလိပ်စာတမ်းကိုပါ အများပြည်သူလေ့လာနိုင်ရန် ထုတ်ပြန်ပေးသွားမှာ ဖြစ်ပါတယ်။

Thumbnail အတွက် အသုံးပြုထားတဲ့ ဓာတ်ပုံကို ရိုက်ကူးပေးခဲ့တဲ့ Click to Fight UK ကိုလည်း အထူးကျေးဇူးတင်ရှိကြောင်း ဖော်ပြအပ်ပါတယ်။ စိတ်ဝင်တစားဖတ်ရှုပေးကြဖို့ ဖိတ်ခေါ်ပါတယ်။"